थौं लुम्बिनीइ झिक्वःगु बौद्ध सम्मेलन
लुम्बिनी (सन्ध्या टाइम्स)/धर्मोदय सभाया ग्वसालय् थनिंनिसें लुम्बिनीया धर्मोदय विहारय् झिक्वःगु राष्ट्रिय बौद्ध सम्मेलन न्ह्यायेत्यंगु दु। राष्ट्रपति डा. रामबरण यादवं थौं न्हिनय् सम्मेलनया उलेज्या यानादीगु ज्याझ्वः दु। धर्मोदय सभाया अध्यक्ष पण्डित बद्रीरत्न वज्राचार्यया सभापतित्वय् जुइगु उलेज्या समारोहय् न्हापां भिक्षुगण, लामागुरु व वज्राचार्य गुरुपिंपाखें प्रार्थना याइगु ज्याझ्वः दु। राष्ट्रपति यादव थौं न्हिनय् १ बजे सेनाया हेलिकप्टरं थन झाइगु ज्याझ्वः दु ।
राष्ट्रपति यादवं बुद्ध प्रतिमाय् स्वांमाः क्वखायेकाः बोधिमत च्याकुसें उगु ज्याझ्वःया उलेज्या यानादी। समारोहय् धर्मोदय सभाया उपाध्यक्ष लक्ष्मीदास मानन्धरयात मूपाहां राष्ट्रपति डा. रामबरण यादवं उपहार लःल्हाइगु ज्याझ्वः दुसा तिलकमान गुभाजुयात धर्मोदय धम्म सिरपाः लःल्हाइगु ज्याझ्वः दु ।
बहनी पाल्पा ज्ञानमाला भजन खलःपाखें भजन न्यंकीगु ज्याझ्वः दु। सम्मेलनया झ्वलय् म्हिगः द्रब्यमानसिं तुलाधर (भाइराजा साहु) पाखें १५ फिट तजाःगु बुद्धमूर्ति लःल्हाःगु खः ।
कन्हय् लुम्बिनी विकास व धर्माचरण विषयय् गोष्ठी जुइ। गोष्ठीइ राष्ट्रिय जनगणना व बौद्ध जागरण, लुम्बिनी विकास व बुद्ध शिक्षा, धर्म निरपेक्षता व लोकतन्त्र नापं लुम्बिनीया सुरक्षा व वातावरण विषयय् यानाः प्यंगू ज्यापौ न्ह्यब्वइगु ज्याझ्वः दु। समापन ज्याझ्वः प्रमुख प्रतिपक्षी नेता पुष्पकमल दाहाल (प्रचण्डं) यानादी।
भारतीय म्येँया विरोध
लुम्बिनीया अशोकस्तम्भ न्ह्यःने म्हिगः छम्ह भारतीय गाइडं थाई पुचःयात भारतया राष्ट्रिय म्येँ हायेकाः प्रार्थना याकूगु खँय् कचवं जुल। उगु ज्यायात नेतात कृष्णगोपाल श्रेष्ठ व तीर्थराम डंगोलपिंसं पनादीगु खः ।
