म्हिगः नं नेप्से कुहां वन
येँ (सन्ध्या टाइम्स)/ नेपाल स्टक एक्सचेन्जय् जूगु शेयर कारोबारं लगातार निन्हुया न्हि कुन्हु नं नेप्से परिसुचक कुहां वंगु दु। थुकुन्हु छन्हु न्ह्यः स्वयाः अप्वः अंकं नेप्से कुहां वन। वंगु वाःया शुरुं निसें थहां वंगु नेप्से थुगु वालय् मंगलवाः कुन्हु निसें थहां वनेगु क्रम दिउगु खः। नेप्सेय् दकलय् अप्वः लाकीगु वाणिज्य, विकास बैंकया लिसें जलविद्युत व अन्या समुहया कारोबार नं कुहां वयेवं नेप्से लगातार निन्हुया न्हि कुन्हु नं कुहां वंगु खः। शेयर बजाः चालेवं तसकं सामान्य अंकं थहां वनेधुंकूगु नेप्से वयां लिपा धाःसा मदिक कुहां वेगु क्रमं कारोबारया अन्त तकं निरन्तरता काःगु खः।
थुकुन्हु नेपाल स्टक एक्सचेन्जय् जूगु शेयर कारोबारय् नेप्से परिसुचक ६ दशमलव ५१ अंकं कुहां वयेवं ५४२ दशमलव १ अंकय् थ्यंगु दु। सेन्सेटिभ १ दशमलव ७१ अंकं कुहां वःगु दुसा फ्लोट इन्डेक्स नं शुन्य दशमलव ९२ अंकं कुहां वल ।
कारोबार जूगु उपसुचकय् वाणिज्य समुह १० दशमलव १४ अंकं कुहां वनाः ५१७ दशमलव ५३ अंकय् थ्यंगु दु। दकलय् अप्वः जलविद्युत समुह १९ दशमलव ९३ अंकं कुहां वनेवं ७९० दशमलव शुन्य ७ अंकय् थ्यन। अथे हे विकास बैंकया कारोबार नं २ दशमलव ६७ अंकं कुहां वनाः ५९५ दशमलव ९७ अंकय् थ्यंगु दु। अन्य समुहया कारोबार नं ५ दशमलव ८८ अंकं कुहां वनाः ५८७ दशमलव ४६ अंकय् थ्यन ।
उखे म्हिगःया कारोबारं व्यापारिक समुहया कारोबार ४ दशमलव ८८ अंकं थहां वनाः २६५ दशमलव ७५ अंकय् थ्यंगु दुसा फाइनान्स समुहया उपसुचक २ दशमलव ५ अंकं थहां वनाः ५६४ दशमलव १९ अंकय् थ्यन ।
नेप्से कुहां वःसां उखे कारोबार धाःसा मेमेगु न्हिया तुलनाय् सामान्य रुपं थहां वनाच्वंगु दु। ख्वीन्हय्गू कम्पनीयाछगू लाख ग्वीन्हय्द्वः स्वसः व नीन्हय्गू कित्ता शेयर कारोबारं न्हय्गू करोड न्हय्खुगू लाख नीप्यद्वः तका दांया कारोबार जूगु दु। छन्हु न्ह्यः जूगु कारोबारय् छगू लाख स्वद्वः व निसः व न्हय्निगू कित्ता शेयर न्याये-मी जुयाः खुगू करोड स्वीस्वंगू लाख पीप्यद्वः तका दांयाकारोबार जूगु खः। वंगु दँय् तक कारोबार जूगु दां थहां वनाः झिगू करोड तका तक थ्यनेधुंकूगु खः ।
कारोबार जूगुली नीप्यंगू कम्पनीया शेयर भाः थहां वंगु दुसा स्वीखुगू कम्पनीया शेयर भाः कुहां वंगु व न्हय्गूया भाः यथावत कायम जूगु खरु स्टक एक्सचेन्जं जानकारी बिउगु दु। अथे हे बैंक अफ काठमाण्डु, नेपाल एसबीआई बैंक व एनसीसी बैंकया शेयरयय् दकलय् अप्वः भाः कुहां वन ।
कारोबार जूगु कम्पनी मध्ये नेपाल आवास विकास वित्त कम्पनीया प्रमोटर शेयरं दकलय् अप्वः छगू करोड पीछगू लाख व झिंस्वद्वः तका दांया कारोबार याःगु दु। उखे गोर्खा विकास बैंकया शेयरधनीतय्सं दकलय् अप्वः द्यापं फयेमाःगु दुसा सहयोगी विकास बैंकया शेयरधनीतय्सं अप्वः लबः कायेत ताःलाःगु दु ।
