अयोग्य लाडाकू चीकेगु कार्ययोजनाय् हस्ताक्षर
राष्ट्रसंघया महासचिवया विशेष प्रतिनिधि राधिका कुमारास्वामीं न्ह्यब्वयादीगु अयोग्य लडाकूतय्त माओवादीं शिविरं चीकेगु कार्ययोजनाय् बुधवाः सरकार व माओवादी प्रतिनिधितय्सं हस्ताक्षर याःगु दु ।
यलय् च्वंगु यूएन हाउसय् जूगु छगू समारोहलय् माओवादीया व्रिगेड कमाण्डर सरण सहयात्री व शान्ति मन्त्रालयया सहसचिव साधुराम सापकोटां कार्ययोजनाय् हस्ताक्षर याःगु खः । कार्ययोजनाय् राष्ट्रसंघया प्रतिनिधिया कथं रवर्ट पाइपर व जिलियन मेल्सपं नं हस्ताक्षर याःगु खः ।
अथेहे कार्ययोजना हस्ताक्षर ज्याझ्वलया साक्षी कथं माओवादी अध्यक्ष पुष्पकमल दाहाल 'प्रचण्ड', शान्तिमन्त्री रकम चेम्जोङ, राधिका कुमारास्वामी व अनमिन प्रमुख करिन ल्यानग्रनं हस्ताक्षर याःगु खः ।
कार्ययोजना कथं वइगु पुस १२ निसें अयोग्य लडाकूतय्त शिविरं पिने लिकायेगु ज्या शुरु जुइ । उगु ज्या पीन्हुया दुने सिधेकीगु ताः तःगु दु । उमित अस्थायी शिविरय् तयाः खुलाः तक प्रमाणिकरण व अनुगमन याइ । उमित याइगु पुनस्थापनाया ज्याय् संयुक्त राष्ट्रसंघं दछि तक अनुगमन याइगु खँ नं कार्ययोजनाय् न्ह्यथंनातःगु दु ।
