नेवाः व ताम्सालिङ स्वयात्त गणराज्य घोषणा
आन्दोलनरत एनेकपा (माओवादीं) बुधवाः नेवाः व ताम्सालिङ स्वयात्त गणराज्यया घोषणा याःगु दु । येँया बसन्पुली जूगु ज्याझ्वलय् माओवादी अध्यक्ष पुष्पकमल दाहाल 'प्रचण्डं' नेवाः स्वायत्त गणराज्यया घोषणा यानादीगु खसाः नुवाकोटया ककनि गाविसया रानीपौवाय् याःगु ज्याझ्वलय् माओवादी उपाध्यक्ष नापं संयुक्त जनआन्दोलन समितिया संयोजक डा. बाबुराम भट्टराईं ताम्सालिङ स्वायत्त गणराज्यया घोषणा यानादीगु खः ।
नेवाः स्वयात्त गणराज्य घोषणा यानादिसें माओवादी अध्यक्ष प्रचण्डं संघीयता विरुद्ध सुनां नं ज्य याःसा समानान्तर सरकार गठन यायेगु ख्याच्वः बियादिल । वयेकलं अज्याःगु समानान्तर सरकार घोषणायात नं सुनां नं पने मफइगु दाबी यानादिल ।
वयेकलं गणराज्य घोषणा ज्याझ्वः शान्ति सम्झौता, अन्तरिम संविधान, जनयुद्ध व जनआन्दोलनया भावना कथं जूगु धयादिसें गणराज्य घोषणा विरुद्ध न्ववाइपिंसं शान्ति सम्झौता स्यंकेत कुतः यानाच्वंगु जूगु द्वपं बियादिल ।
ज्याझ्वलय् वयेकलं संघीय व्यवस्थां दक्वसिंया प्रतिनिधित्व सुनिश्चित याइगु धयादिसें संघीयतायात समावेशी व समानुपातिक सिद्धान्त कथं यंकेमाःगु धयादिल । नापं वयेकलं आः स्थानीय जल, जंगल व जमिनया हकदार स्थानीय जनताय् हे जुइगु धयादिसें निस व पीदँया प्रतिगामी राज्य व्यवस्थां उत्पीडनय् लाकूगु जनताया निंतिं राजनीतिक अग्राधिकारया व्यवस्था यायेमाःगु पक्षय् माओवादी दुगु धयादिल ।
अथेहे बुधवाः हे माओवादीं नुवाकोटया रानीपौवाय् याःगु ज्याझ्वलय् ताम्सालिङ गणराज्यया घोषणा यानादिसें उपाध्यक्ष भट्टराईं माओवादीं जनताया पक्षय् संविधान च्वयेत संघर्ष यानाच्वंगु धयादिसें दक्वं जनतां थःगु हक अधिकार कायम मयातल्ले माओवादीं आन्दोलन यानाच्वनीगु धयादिल ।
