प्रधानमन्त्रीया किजा विरुद्ध अभियान
येँ (सन्ध्या टाइम्स)/प्रधानमन्त्री माधव नेपालया किजा विनोद नेपालयात हङकङया नितिं महावाणिज्य दूत कथं स्वीकार मयायेत नेपाल अदिवासी जनजाति महासंघ हङकङ शाखां चिनियाँ व हङकङ सरकारयात दवाव बिउगु दु ।
थुकिया निंतिं उमिसं वंगु सोमवाः हङकङया शिष्टाचार महापालया पौ बिउगु खः। उकी नेपालया एग्रिमो स्वीकृत मयायेत इनाप याःगु दु। उमिसं बेइजिङस्थित चिनियाँ परराष्ट्र मन्त्रालययात नं पौ बिउगु दु। सरकारं कुटनीतिक नियुक्ति समावेशी यायेमाः धकाः माग यासें उगु विरोध याःगु खःसा थःपिनिगु माग पूरा मयात धाःसा सतकय् प्रदर्शन यायेगु ख्याच्वः नं बिउगु दु ।
लत्या न्ह्यः हे प्रधानमन्त्रीया किजायात महावाणिज्य दूत नियुक्त यायेत चिनियाँ परराष्ट्र मन्त्रालयय् पौ छ्वयाहये धुंकूगु जूसां आः तकं चीनं उकियात स्वीकृत धाःसा मयाःनि।
थ्वहे झ्वलय् प्रशासन सेवाया महावाणिज्यदूत दयेकेगु नियम हिलाः मन्त्रिपरिषदं इन्जिनियर नेपालयात नियुक्त याःगु विरुद्ध सर्वोच्च अदालतय् तःगु मुद्दा विचाराधीन अवस्थाय् लानाच्वंगु दु ।
