कर्मचारीं सिंहदरवार घेरे याइगु
येँ (सन्ध्या टाइम्स)/देय्न्यंकंया स्थानीय निकाय अनिश्चितकाल तकया निंतिं बन्द याःपिं स्थानीय निकायया कर्मचारीतय्सं न्हूगु चरणया ज्याझ्वः कथं वइगु पुस ९ गते सिंहदरवार घेराउ याइगु जूगु दु ।
स्थानीय निकाय केन्द्रीय आन्दोलन समन्वय समितिया म्हिगः च्वंगु मुँज्यां न्हूगु चरणया आन्दोलन कथं कन्हय् पत्रकार सम्मेलन यायेगु, पुस ३ गते येँ महानगरपालिकया ज्याकू बागदरवार लागां विरोध जुलुस पिकयाः येँ देय् चाःहिलाः स्थानीय विकास मन्त्रालय वनाः विरोध सभा यायेगु, पुस ५ गतेनिसें स्थानीय निकायया अत्यावश्यक ज्या फोहर मुंकेगु, दमकल चले यायेगु नापं एम्बुलेन्स चले यायेगु ज्या तकं ठप्प यायेगु, पुस १० गतेनिसें न्हियान्हिथं हे स्थानीय विकास मन्त्रालयय् धर्ना च्वनेगु खँ क्वःछिउगु दु।
एनेकपा (माओवादी), नेपाली कांग्रेस व नेकपा (एमाले) लिसे सतीगु कर्मचारी संगठनत जानाः उगु मंकाः मोर्चा दयेकाः संघर्ष याना वयाच्वंगु खः ।
