कार्यदल हानं अलमल
येँ (सन्ध्या टाइम्स)/राष्ट्रपतिया पलाः भिंकेगु लागिं तयार यानाच्वंगु मंकाः संकल्प प्रस्तावयात अन्तिम रुप बीगु लागिं म्हिगः च्वनेगु धाःगु स्वंगू तःधंगु पार्टीया शीर्ष बैठक च्वने मफुत। तर बैठक छाय् च्वने मफुत धइगु बारे धाःसा स्वंगू पार्टीया स्वंगू हे बिचाः वःगु दुसा बैठक च्वने मफुगु खँय् फुक्क पार्टीं छम्हं मेम्हेसित द्वपं बीगु ज्या जक याःगु दु।
म्हिगः स्वंगू पार्टीया कार्यदल व शीर्ष नेतातय् बैठक च्वनी धाःगुलिं थःपिंत सःता हइ धकाः एमालेया नेतात न्हिछि हे पियाच्वंगु जुयाच्वन। न्हिछि पिलं नं बैठकय् सःता महयेवं लिपा कायल जुयाः वय्कःपिं लिहां वंगु खः। म्हिगःया बैठक नेकां सभापति गिरिजाप्रसाद कोइरालाया छेँय् च्वनेगु खँ जूगु खः। उकिया निंतिं कृष्णप्रसाद सिटौलायात व्यवस्थापनया जिम्मा बियातःगु खः। तर माओवादीं बैठक च्वनेगु ई न्यनेत सभापति कोइरालायात फोन यानाः न्यंबलय् कोइरालां कार्यदलया ज्या हे सिमधःनि शीर्ष नेतात बैठक च्वनां छु याये धकाः लिसः बिया छ्वत। उकिं माओवादीत बैठकय् मवल ।
सिटौलां धाःसा कार्यदलया बैठकं निर्णय याये मफयाः ला शीर्ष नेतातय् बैठक च्वनेमाःगु खः नि धाःगु दु। बैठक थौं नं च्वनेगु ठेगान मदुनि ।
