औद्योगिक ख्यःयात बिस्कं मतया आपूर्ति

लोडशेडिङया मारय् लानाः प्रभावित जुयाच्वंगु औद्योगिक क्षेत्र बचे यायेगु लागिं सरकारं बिस्कं लाइन विद्युत आपूर्ति यायेगु खँ धाःगु दु । पोखराय् लाथ्व ज्या शुरु नापं यायेधुंकूगु दु । नेपाःया उद्योग ख्यः अथें नं रुग्ण अवस्थाय् लानाच्वंगु दु । मजदूर हडतालं यानाः जक नं मखु देय्या आर्थिक नीतिया कारणं विदेशी उत्पादन लिसे प्रतिस्पर्धा याये मफयाः व नेपाःया उत्पादन पिने छ्वये मफयाः नं देय्या उद्योग ख्यः ध्वस्त जुयाच्वंगु दु । आः ल्यनाच्वंगु छुं उद्योगत नं लोडशेडिङं यानाः ध्वस्त जुइगु करिब निश्चित दु । मतया कारणं बांलाक उद्योग चले याये मफयाः बजारय् सामानया भाःथहां वनेगु शुरु जुइधुंकूगु दु । अझ गुलिखे सामानया उत्पादन हे म्हो जुयाः बजारय् पिहां वयेगु नापं म्हो जुइधुंकूगु दु । थुकिं उपभोक्तात मारय् लाइगु ला द हे दु लिसें अन ज्या याईपं ज्यामि व उद्योगपति नं मारय् लाइगु स्वाभाविक खः ।

थज्याःगु अवस्थाय् देय्या उद्योगयात बचे यायेगु सरकारया दायित्व जुइमाः । लोडशेडिङं सर्वसाधारणया न्हियान्हिथंया जीवनय् लिच्वः लाइगु लाद हे दु । तर उद्योग व्यवसायय् नापं लिच्वः लाः वन धाःसा उकिं मनूतय् रोजगारी व देय्या अर्थतन्त्रयात नापं लिच्वः लाः वनीगु खतरा वइ । यिद उद्योग ध्वस्त जुल धाःसा उकिं देशय् मेगु हे अवस्था पिकया बी । उिकं अज्याःगु अवस्था वये न्ह्यः हे छुं यायेगु खःसा सरकारं कम से कम नं देय्या थीथी औद्योगिक क्षेत्रय् मतया आपूर्ति यायेगु ज्या जुइमाः । थुकियात सुनां नं अन्यथा तायेकेमाःगु आवश्यकता मदु । थौंया इलय् उद्योग बचे जूसा हे जक देय् व जनता बचे जुइ । थुकी सरकार लिउने लाये मजिउ ।

More Stories Like this