नेप्से ६ अंकं कुहां वन
येँ (सन्ध्या टाइम्स)/ वंगु वाःया शुरुं निसें लगातार गुन्हु तक मदिक थहां वंगु नेप्से म्हिगः हाकनं कुहां वःगु दु। स्टक एक्सचेन्जया कथं नेप्सेय् अप्वः प्रभाव लाकीगु वाणिज्य समुहया कारोबार कुहां वयेवं नेप्से नं कुहां वंगु खः। बजाः चालेवं हे कुहां वयेगु शुरु जूगु नेप्से इलय् ब्यलय् थहां वंसां छन्हु न्ह्यःया अंकंयात पुलाः थहां वने धाःसा मफुत ।
छन्हु न्ह्यःया कारोबारय् सामान्य अंकं थहां वंगु नेप्से ५ दशमलव ९३ अंकं कुहां वयाः ५४८ दशमलव ६१ अंकय् थ्यंगु दु। अथे हे नेप्सेया लिसें सेन्सेटिभ २ दशमलव ११ अंकं व फ्लोट इन्डेक्स शुन्य दशमलव ७८ अंकं कुहां वल ।
नेपाल स्टक एक्सचेन्जया न्यय्न्हय्गू कम्पनीया शेयर कारोबार जूगुली म्हिगः स्वीन्यागू कम्पनीया शेयर भाः कुहां वःगु दु। अथे हे झिंच्यागू कम्पनीया शेयर भाः थहां वंगु दुसा प्यंगु कम्पनीया शेयर भाः यथावत हे जुल ।
स्टक एक्सचेन्जया म्हिगःया कारोबारय् दक्वं समुहया उपसुचक कुहां वंगु दु। एक्सचेन्जया कथं शेयर कारोबार जूगु कम्पनी मध्यय् वाणिज्य प्रमुख बैंकत स्टायण्डर्ड चार्टर्डया ९५/-, नविल बैंकया ८९/-, बीओकेया ४०/- व इन्भेष्टमेण्टया ३५/- तका दां प्रति कित्ता शेयरय् भाः कुहां वयेवं वाणिज्य समुह दकलय् अप्वः ११ दशमलव ३३ अंकं कुहां वयाः ५२७ दशमलव ६७ अंकय् थ्यंगु दु। अथे हे विकास बैंक समुहया सुचक नं ३ दशमलव १३ अंकं कुहां वनाः ५९८ दशमलव ६४ अंकय् थ्यन। जलविद्युत समुहया उपसुचक ३ दशमलव ३१ अंकं कुहां वनाः ८१० अंकय् थ्यंगु दु।
अथे हे फाइनान्स समुह २ दशमलव ५३ अंकं कुहां वनेवं ५६१ दशमलव ६९ अंकय् थ्यंगु दु। वीमा समुह नं शुन्य दशमलव २६ अंकं कुहां वनाः ५७१ दशमलव ० अंकय् थ्यंगु दुसा छन्हु न्ह्यः कुहां वंगु अन्य समुहया उपसुचक म्हिगःया शेयर कारोबारं ५ दशमलव ८८ अंकं थहां वन ।
वंगु गुन्हु न्ह्यःनिसें लगातार नेप्से थहां वनाच्वंगु इलय् शेयर कारोबार म्हो जकल जुयाच्वंगु खःसा म्हिगः नेप्से कुहां व.गु इलय् धाःसा शेयर कारोबार थहां वंगु दु। स्टक एकसचेन्जय् म्हिगः छगू लाख स्वद्वः व निसः व न्हय्निगू कित्ता शेयर न्याये-मी जुयाः खुगू करोड स्वीस्वंगू लाख पीप्यद्वः तका दांया कारोबार जुल ।
कारोबार कम्पनी मध्ये स्टायण्डर्ड चार्टर्ड बैंकं दकलय् अप्वः ग्वीनिगू लाख न्यय्न्हय्द्वः तका दांया कारोबार याःगु दु। अथे हे ग्लोबल बैंक लिमिटेडया शेयरधनीतय्सं दकलय् अप्वः लबः कायेत ताःलाःगु दुसा सहयोगी विकास बैंक लिमिटेडया शेयरधनीतय्सं दकलय् अप्वः द्यापं फयेमाःगु दु।
अरुण भ्याली हाइड्रोपावर डेभ.कं. लि.या दकलय् अप्वः ६१० क्वः तक शेयर कारोबार जयाः १२, ४६० कित्ता शेयर न्याये-मी जूगु दु। दकलय् अप्वः एभरेष्ट बैंक लि. कन्भर्टीबल प्रिफरेन्सया शेयरय् प्रति कित्ता ३७/- तका दां थहां वंगु दु ।
