अनमिनया म्याद थपे याइगु
प्रधानमन्त्री माधवकुमार नेपालं संयुक्त राष्ट्रसंघीय महासचिव बान कि मुनयात राष्ट्रसंघीय मिसन अनमिनया म्याद हानं थप यायेगु सरकारया बिचाः दुगु खँ धयादीगु दु ।
जलवायु परिवर्तन सम्बन्धी विश्व सम्मलेनय् ब्वति कायेत कोपनहेगन थ्यंकादिम्ह प्रधानमन्त्रीं मंगलवा: राष्ट्रसंघया महासचिव नाप खँल्हाबंला यानादिसें वयेकलं पूर्वनिर्धारित अवधि दुने हे संविधान निर्माण व शान्ति प्रकृयायात क्वचायेकेत थम्हं कुतः यानाच्वनाःगु धयादिसें शान्ति प्रकृया न्ह्यः हे माओवादी लडाकूतय् व्यवस्थापन यायेमाःगु धयादिल ।
अथेहे वयेकलं माओवादी लडाकूया व्यवस्थापन स्वलाः दुने हे यायेगु बिचाः थम्हं यानाःगु व उगु ईलय् तकया निंतिं अनमिनया म्याद थप यायेत सरकार लगेजुयाच्वंगु जानकारी महासचिव वान यात याकादीगु खः । अनमिनया म्याद थ्वहे वइगु माघ ९ गते फुइत्यंगु दु ।
जलवायु परिवर्तन सम्बन्धी विश्व सम्मेलनस्थलय् जूगु खँल्हाबंलाय् जलवायु परिवर्तन सम्बन्धी नेपाःया भूमिका, कालापथरय् च्वंथु मन्त्रीपरिषदया बैठक बारे नं खँल्हाबंला जूगु खः ।
