स्वंगू दलया अडान संविधान निर्माणय् बाधा : नेम्वाङ
संविधानसभाया अध्यक्ष सुवाष नेम्वाङं प्रमुख स्वंगू दलया थःथःगु अडानया कारणं संविधान निर्माण यायेगु ज्या लिबानाच्वंगु खँ धयादीगु दु ।
बुधवाः धौख्यलय् संविधानसभा जनमत संकलन व समन्वय समितिया ग्वासा:लय् जनमत संकलन सन्दर्भ अभिप्रेरणामुखी अन्तक्रिया ज्याझ्वलय् न्ववानादिसें वयेकलं स्वंगू दलया शीर्ष नेतातय्त राजनीतिक सहमति मालाः तत्काल संविधन निर्माण यायेगु ज्याय् इमान्दार जुया लगेजुइत इनाप यानादिल ।
वयेकलं संविधान ईलय् हे निर्माण मजुसाः देशय् संकट वइ धकाः नेतातय्सं स्यूसां छाय् सहमति यायेमफुगु धकाः न्ह्यसः तयादिल । वयेकलं यदि संविधान ईलय् निर्माण मजुसाः तत्कालीन शाही शासन काल थें संविधानसभाया हालत जुइगु खँ प्रति सजग जुइत नेतातय् ध्यानाकर्षण नं याकादिल ।
अथेहे वयेकलं स्वंगूलिं प्रमुख दलया नेतातय्त थःपिनिगु पार्टीया सभासदतय्त संविधानसभाया बैठकय् छ्वया ग्वाहालि यायेत इनाप यानादिल ।
