देय्न्यंकया स्थानीय निकाय ठप्प
स्थानीय स्वायत्त शासन नियमावलीलय् संशोधनया माग यासें कर्मचारीतय्सं देय्न्यंकया स्थानीय निकाय ठप्प याःगु दु ।
मंगलवाः निसें सुरु जूगु आन्दोलनया कारणं देय्न्यंकया न्यय्च्यागू नगरपालिका, न्हय्न्यागूलिं जिल्ला विकास समिति व स्वद्वं स्वयां अप्वः गां विकास समितिया ज्या बुधवाः नं ठप्प जूगु दु ।
स्थानीय निकाय व निजामत सेवाया कर्मचारी दथुइ विभेद दुगु धासें आन्दोलनकारीतय्सं नियमावली संशोधन यानाः माग सम्बोधन मयातल्ले अनिश्चितकाल तक ज्या ठप्प यायेगु ख्याच्वः ब्यूगु दु । नापं थःपिनिगु मागया सुनुवाई मजुसाः वइगु पुस ५ गते निसें स्थानीय निकाय सम्बद्ध अत्यावश्यकीय सेवा नं बन्द यायेगु खँ आन्दोलनरत राष्ट्रिय कर्मचारी संगठनं धाःगु दु ।
संगठनं स्थानीय निकाय सेवा आयोग गठन, बृत्ति विकास व पेशागत सुनिश्चितता, बीमाया व्यवस्था, २०६५ असोज लिपा नियुक्त कर्मचारीतय्त सिमित प्रतिस्पर्धा मार्फत स्थायी यायेमाःगु लगायतया माग यानाः मंगलवाः निसें आन्दोलनय् कुहांवःगु खः ।
