चीनं नेपाली सेनायात २ करोड ८० लाख युआन ग्वाहालि
चीनं नेपाली सेनायात २ करोड ८० लाख युआन ग्वाहालि याइगु जूगु दु । नेपाः भ्रमणय् दुगु चिनियाँ सैनिक पुचल व रक्षामन्त्री विद्या भण्डारी दथुइ बुधवाः जूगु खँल्हाबंलाय् उगु ग्वाहालि यायेगु प्रतिबद्धता प्वंकूगु खः ।
रक्षामन्त्री भण्डारी नापया खँल्हाबंलाय् चिनियाँ पुचलं २ करोड युआन बराबरया नेपाली सेनाया आवश्यकता कथं उपकरण व नेपाल-चीन सीमा क्षेत्रय् नेपाली भु-भागय् मैत्री भवन दयेकेत ८० लाख युआन ग्वाहालि यायेगु प्रस्ताव तःगु खः ।
चिनियाँ ग्वाहालिया विषयलय् सैनिक मुख्यालयलय् नेपाःया पाखें मेजर जनरल गौरवशमशेर राणा व चिनियाँ सैनिक पुचःया नेता मेजर जनरल जिया जियाओनिङं हस्ताक्षर यायेगु ज्याझ्वः क्वःछीउगु दु ।
खँल्हाबंलाय् रक्षामन्त्री भण्डारीं शान्तिकालय् सेनाया भूमिका कथं ग्वहालि यायेत चिनियाँ पुचःयात इनाप यानादीगु खः । नापं वयेलं सैनिक अस्पताया विस्तारया निंतिं नं ग्वाहालि यायेत प्रस्ताव तयादीगु खः ।
अथेहे खँल्हाबंलाया झ्वलय् चिनियाँ पुचलं रक्षामन्त्री भण्डारी व रक्षा सचिव नविन घिमिरेयात चीन भ्रमणया निंतिं इनाप नं याःगु खः ।
