'शान्ति सम्झौता उल्लंघन याइपिं सुयातं त्वःतेमखु'
गृहमन्त्री भीम रावलं शान्ति सम्झौता उल्लंघन यानाः ज्या याइपिं सुयातं मत्वःतेगु धयादिसें अज्याःपिंत कारवाही यायेत सुरक्षा अधिकारीतय्त निर्देशन बियादीगु दु ।
येँया हल्चोकय् च्वंगु सशस्त्र प्रहरी बलया मुख्यालय् बुधवाः निसें शुरु जूगु सीमा सुरक्षा गोष्ठीया उल्लेज्या यानादिसें वयेकलं शान्ति प्रकृया क्वचायेकेत अराजकताया अन्त्य यायेमाःगु व सुरक्षा अवस्था बांलाकेमाःगु धायादिसें सुरक्षाकर्मीतय्त निर्भिक जुयाः थःगु जिम्मेवारी पूवंकेत निर्देशन बियादिल । वयेकलं सुरक्षाकर्मीतय्त थःगु जिम्मेवारी पूवंकेत थाकूसाः सरकारं सुरक्षा निकायया पक्ष माक्वः ग्वाहालि याइगु बचं नं बियादिल ।
स्वन्हु तक न्ह्याइगु गोष्ठीलय् गृहमन्त्री रावलं खुला सीमा क्षेत्रया फाइदा कयाः अपराधिक पुचलं चलखेल यायेफइगु धयादिसें उकी सजक जुइत इनाप यानादिल । सिमा क्षेत्रय् ज्या याइपिं सुरक्षाकर्मीत स्वच्छ छवीया जुइमाःगु धयादिसें केन्द्रं सुरक्षा नीति लागू यायेगु स्वयां आन्तरिक सुरक्षा सुदृढ यायेमाःगु खँ बः बियादिल ।
