शीर्ष नेतातय् बैठक स्थगित
मंकाः संकल्प प्रस्तावया मस्यौदाय् सहमति मजुइवं मंगलवाः च्वनीगु धाःगु शीर्ष नेतातय् बैठक अन्तिम ईलय् वयाः स्थगित जूगु दु । सहमति मजुइवं आः शीर्ष नेतातय् बैठक अनिश्चित जूगु दु ।
राष्ट्रपति डा. रामवरण यादवं सेनापति प्रकरणय् ल्ह्वंगु पलाः असंवैधानिक जूगु व राष्ट्रपतिं द्वंकूगु धकाः संकल्प प्रस्तावय् न्ह्यथने माःगु अडान माओवादीं अझ कयाच्वंगु दुसाः कांग्रेस न एमालें राष्ट्रपतिया बारे छुं नं खँ न्ह्यथने मज्यूगु अडान कयाच्वंगु दु ।
थ्वस्वयां न्ह्यः माओवादी, कांग्रेस व एमालेया निम्ह-निम्ह नेतात दुथ्याःगु कार्यदलं नं थ्वहे विषयलय् सहमति यायेमफेवं थुकी भाय् मिले यायेगु नापं अन्तिम रुप बीगु जिम्मा शीर्ष नेतातय् ब्यूगु खः । मंगलवाः हे हानं कार्यदलया बैठक च्वनाः थप सहलह यायेगु धाःसां कार्यदलया बैठक नं च्वनेमफुत ।
मंगलवाः सुथय् कांग्रेस नेतातय्सं सभापति गिरिजाप्रसाद कोइराला नापलाना संकल्प प्रस्तावया बारे सहलह याःगु खः । उगु ईलय् सभापति कोइरालां कार्यदलं सहमतिया दस्तावेज मदेयेकूतल्ले शीर्ष नेतातय् बैठक मसतेत इनाप यानादीगु खः ।
अथेहे मंगलवाः सुथय् हे माआवादी अध्यक्षं सोलखुम्बुया फाप्लु बिमानस्थलय् पत्रकारत नाप खँल्हाबंला यानादिसें थौं च्वनीगु शीर्ष नेतातय् बैठकं सहमति याइगु दाबी यानादीगु खः । वयेकलं छुं विषयलय् जक सहमति जुइ ल्यंदनीगुलिं उकीयात शीर्ष नेतातय् बैठकं सहमति याइगु खँ धयादीगु खः ।
