माओवादीं थप निगू स्वायत्त गणराज्य घोषणा
नागरिक सर्वोच्चताया माग यासें स्वंगूगु चरणया आन्दोलन कथं स्वयात्त गणराज्य घोषणा यानाः आन्दोलन यानाच्वंपिं एनेकपा (माओवादीं) मंगलवाः थप निगू स्वायत्त गणराज्य घोषणा याःगु दु । मंगलवाः माओवादीं भेरी-कर्णाली व भोटे-लामा यानाः थप निगू स्वायत्त गणराज्य घोषणा याःगु खः ।
जुम्लाया सदरमुकाम खलङ्गाय् याःगु छगू ज्याझ्वःया दथुइ माओवादी विदेश विभाग प्रमुख कृष्णबहादुर महरां भेरी-कर्णली गणराज्यया घोषणा यानादीगु खः । उगु ज्याझ्वलय् न्ववनादिसें महरां माओवादीं यानाच्वंगु गणराज्य घोषणा प्रचारात्मक जक जूगु धयादिल ।
अथेहे मंगलवाः हुम्लाया सिमिकोटय् याःगु ज्याझ्वलय् माओवादी स्थायी समिति दुजाः नेत्रविक्रम चन्दं भोटे-लामा गणराज्यया घोषणा यानादीगु खः ।
मंगलवाः माओवादीं याःगु थप निगू गणराज्य घोषणा नापं थुकीया ल्याः च्यागू थ्यंगु दु । झिंप्यंगु गणराज्यया प्रस्ताव याःगु माओवादीं बुधवाः नेवाः गणराज्य व ताम्सालिङ गणराज्य घोषणा याइगु ज्याझ्वः दु । बुधवाः माओवादी अध्यक्ष प्रचण्डं नेवाः व उपाध्यक्ष डा. बाबुराम भट्टराईं ताम्सालिङ गणराज्य घोषणा याइगु ज्याझ्वः दु ।
