गणराज्य घोषणा लित कायेत कांग्रेसया इनाप
नेपाली कांग्रेसं आन्दोलनरत एनेकपा (माओवादीं) स्वंगूगु चरणया आन्दोलन कथं यानाच्वंगु स्वायत्त गणराज्य घोषणा ज्याझ्वः लितकायेत इनाप याःगु दु । अथेहे कांग्रेसं माओवादीं सम्पत्ति, छेँबुं, जंगल लगायात कब्जा यानाः शान्ति सम्झौता विपरित ज्याः याःगु धासें अज्याःगु ज्याः तुरुन्त बन्द यायेत नं इनाप याःगु दु ।
सत्तारुढ दलतय्सं तःक्वः हे इनाप याःसां थःगु पूर्व निर्धारित ज्याझवः कथं माओवादीं स्वयात्त गणराज्य घोषणा यानाच्वनेवं मंगलवाः छगू पत्रकार सम्मेलन यानाः कांग्रेसं थ्व इनाप याःगु खः । पार्टी ज्याकू सानेपाय् याःगु पत्रकार सम्मेलनय् संसदीय दलया नेता रामचन्द्र पौडेलं माओवदीं गणराज्य घोषणा याना: मुठभेड ब्वलंकीगु धयादिसें सहमतिया निंतिं जुसां गणराज्य घोषण यायेगु ज्याझ्वः लितकायेत माओवादीयात इनाप यानादिल ।
वयेकलं माओवादी संविधान निर्माणय् बाधक जूगु द्वपं बियादिल । संविधान विघटनया हल्ला याना जुइपिं माओवादीं हे संविधानसभाया बाधक जूगु धासें नेता पौडेलं आपत्ति प्वंकादिल ।
