चक्काजाम याःपिं आदिवासी जनजातितय् ज्वनाः हानं त्व:तल

न्हूगु संविधानय् आत्मनिर्णयया अधिकार सहित जातीय स्वसाशनया ग्यारेण्टी व आदिवासीतय् अधिकार सुनिश्चित यायेमाःगु माग नापं माइतीघर मण्डलाय् चक्काजाम यानाच्वंपिं ७० म्ह स्वयां अप्वः प्रदर्शनकारीतय्त प्रहरीं ज्वनाः हानं त्वःतुगु दु ।

आदिवासी जनजाति बृहत मोर्चां ग्वसाःग्वःगु मंगलवाः न्हिनय् झिंनिताः ईलय् शुरु जूगु चक्काजाम ज्याझ्वलय् प्रहरीं हस्तक्षेप यानाः प्रदर्शनकारीतय्त ज्वनाः यंकूगु खः । ज्वनाः महेन्द्र पुलिस क्लबय् कुनातःपिं दक्वं प्रदर्शनकारीतय्त स्वघौ लिपाः प्रहरीं त्वःतुगु खः ।

प्रहरीं मोर्चाया सचिव कृष्णबहादुर भट्टचन, सभासद्त सुरेश आलेमगर व गमबहादुर श्रीसमगर, आदिवासी जनजाति महिला महासंघया महासचिव सोमा राई, थरुहटया अध्यक्ष लक्ष्मण थारु, आदिवासी महिला अधिकारकर्मी संगिनी रानामगर लगायात ज्वनाः यंकूगु खः ।