थौं निगू गणराज्य घोषणा
येँ (सन्ध्या टाइम्स)/ माओवादीं संघर्षया हे झ्वलय् यानाच्वंगु गणराज्य घोषणा ज्याझ्वः कथं थौं क्षेत्रयी राज्य कथं भेरी-कर्णाली स्वायत्त गणराज्य व जातीय राज्य कथं भोटे-लामा स्वायत्त गणराज्य घोषणा यायेत्यंगु दु। माओवादीया उपाध्यक्ष नारायणकाजी श्रेष्ठ 'प्रकाशं' जुम्लाय् भेरी-कर्णाली गणराज्य स्थायी समितिया दुजः नेत्रविक्रम चन्द (विप्लवं) हुम्ला व सिमिकोटय् भोटे-लामा गणराज्य घोषणा याइगु ज्याझ्वः दु ।
म्हिगः सोलुखुम्बुया सल्लेरीइ शेर्पा गणराज्य व खोताङया दिक्तेलय् किराँत गणराज्य घोषणा याःगु खः। माओवादीं न्ह्याकाच्वंगु स्वंगूगु चरणया ज्याझ्वः कथं कन्हय् येँया बसन्तपुली माओवादी अध्यक्ष प्रचण्डं नेवाः स्वायत्त गणराज्य व नुवाकोटया रानीपौवाय् उपाध्यक्ष डा. बाबुराम भट्टराईं ताम्सालिङ स्वायत्त गणराज्य घोषणा याइगु ज्याझ्वः दु ।
