स्थानीय निकाय अनिश्चितकाल तक बन्द
येँ (सन्ध्या टाइम्स)/स्थानीय निकायय् क्रियाशील जुयाच्वंगु न्यागू कर्मचारी संगठनया मंकाः मोर्चा 'स्थानीय निकाय केन्द्रीय आन्दोलन समन्वय समिति'या ग्वसालय् कर्मचारीतय्सं थौं देय्न्यंकंया स्थानीय निकायय् तालं ग्वया बिउगु दु। थुकिं यानाः स्थानीय निकाय अनिश्चितकाल तकया नितिं बन्द जूगु दु ।
स्थानीय निकायय् क्रियाशील जुयाच्वंगु माओवादीलिस सतीगु नेपाल राष्ट्रिय कर्मचारी संगठन स्थानीय निकाय, कांग्रेसलिसे सतीगु स्थानीय निकाय कर्मचारी युनियन, एमालेलिसे सतीगु स्थानीय निकाय कर्मचारी संघ, सकलें कर्मचारी मंकाः पुचः धयातःगु नेपाल नगरपालिका कर्मचारी एशोसिएसन व गाविस कर्मचारी संघया मंकाः मोर्चाया स्थानीय निकाय केन्द्रीय आन्दोलन समन्वय समितिं स्वंगूगु नापं निर्णायक आन्दोलन धकाः थौं देय्न्यंकंया येँ महानगरपालिका, न्यागू उपमहानगरपालिका, ५२ गू नगरपालिका, ७५ गू जिविस व थ्यंमथ्यं प्यद्धःगू गाविसय् तालं ग्वया बिउगु खः ।
२०६५ असार तकया दुने नियुक्ति जूपिंत स्थायी यायेमाःगु, ट्रेड युनियनया अधिकार दयेमाःगु, स्थानीय सेवा आयोग नीस्वनेमाःगु नापं थीथी कथंया माग तयाः आन्दोलन याना वयाच्वंगु उगु समितिं पु ४ तकया दुने नं थःपिनिगु माग पूवन धाःसा पुस ५ निसें स्थानीय निकायपाखें न्ह्याकाच्वंगु अत्यावश्यक फोहरमैला, एम्बुलेन्स व दमकल सेवा तकं बन्द यायेगु ख्याच्वः बियातःगु दु। प्रधानमन्त्री देशय् मदुगु, माओवादीया बन्द आदि कारणं थ्व बन्द तःन्हु तक न्ह्याइगु खनेदु धाःगु दु ।
