म्हिगः नेप्से सामान्य सुधार
येँ (सन्ध्या टाइम्स)/नेपाल स्टक एक्सचेन्जय् जुयाच्वंगु शेयर कारोबारं नेप्से परिसुचक थहां वनेगु क्रमं म्हिगः तक नं निरन्तरता काःगु दु। वंगु वाःया शुरुंनिसें मदिक थहां वनाच्वंगु नेप्से परिसुचक निरन्तर थहां वनेगु झ्वलय् म्हिगः धाःसा सामान्य जक सुधार जूगु दु। स्टक एकसचेन्जय् शेयर बजाः चालेवं वंगु छवाःया न्ह्यःया थुखे नेप्से छक्वलं मदिक थहां वनाच्वंगु खःसा म्हिगः धाःसा नेप्से गाक्कं थहांकुहां जुल ।
स्टक एक्सचेन्जया कथं कारोबार जूगु कम्पनी मध्यय् दकलय् अप्वः बैक अफ काठमाण्डुया शेयरय् प्रति कित्ता ३२९/- तका दां कुहां वःगु दु। अथे हे एभरेष्ट बैंया शेयरय् नं प्रति कित्ता ५६/- दां कुहां वःसां मेमेगु वाणिज्य समुहया कारोबारं थहां वंगु नेप्से छगू इलय् ५५७ अंक तक थ्यने धुंकूगु खःसा अन्तय् बजाः बन्द जूगु इलय् तक थ्यंबलय् १ दशमलव १४ अंकं थहां वनाः ५५४ दशमलव ५४ अंकय् थ्यन। सेन्सेटिभ नं शुन्य दशमलव ९५ अंकं थहां वंगु दुसा फ्लोट इन्डेक्स शुन्य दशमलव ३८ अंकं थहां वन ।
शेयर कारोबारं नेप्से थहां वनेगुली मू भूमिका दुगु वाणिज्य समुह ४ दशमलव ४९ अंकं थहां वनाः ५३९ अंकय् थ्यंगु दु। दकलय् अप्वः थहां वंगु विकास बैंक समुह ६ दशमलव ३६ अंकं थहां वनेवं ६०१ दशमलव ७७ अंकय् थ्यंगु दु। फाइनान्स समुह १ दशमलव ५९ अंकं थहां वनाः ५६४ दशमलव २२ अंकय् थ्यन। छन्हु न्ह्यःया कारोबारय् कुहां वःगु इन्स्योरेन्स समुह म्हिगः शुन्य दशमलव ४७ अंकं थहां वनेवं ५७२ दशमलव १६ अंकय् थ्यन ।
मेखे म्हिगःया शेयर कारोबारं होटल समुह ३ दशमलव ४१ अंकं कुहां वयेवं ३६६ दशमलव ३४ अंकय् थ्यंगु दु। जलविद्युत समुह नं म्हिगःया कारोबारं २ दशमलव ३५ अंकं कुहां वयेवं ८१३ दशमलव ३१ अंकय् थ्यंगु दुसा दकलय् अप्वः अन्य समुहया उपसुचक १० दशमलव ५७ अंकं कुहां वनाः ५८७ दशमलव ४६ अंकय् थ्यन ।
नेप्से थहां वनाच्वंसां थुकिया लगानीकर्तातय् दथुइ ब्वनाच्वंगु निराशा धाःसा अझं चिलावंगु खने मदुनि। लगातार नेप्से थहां वनाच्वंसां शेयर व दांया कारोबार धाःसा सन्तुष्टिगत रुपं अझं थहां वनाच्वंगु मदुनि। ख्वीगू कम्पनीया कारोबार जुगुली स्वीस्वंगू कम्पनीया शेयर भाः थहां वंगु दुसा झिंन्हय्गू कम्पनीया शेयर भाः कुहां वन। म्हिगः झिगू कम्पनीया जक शेयर भाः यथावत हे जुल। स्टक एक्सचेन्जया कथं म्हिगः न्यागू करोड न्हय्न्हय्गू लाख व स्वीस्वद्वः तका दां बराबरया चय्च्याद्वः व स्वसः व न्हय्स्वंगू कित्ता शेयर न्याये-मी जुल ।
कारोबार जूगु कम्पनी मध्ये नेपाल एसबीआई बैंकं दांया ल्याखं दकलय् अप्वः ग्वीगू लाख व झिंन्याद्वः तका दांया कारोबार याःगु दु। एभरष्ट बैंक लिमिटेड कन्भर्टीबल प्रिफरेन्सं अप्वः लब काःगु दुसा ओरियन्टल होटल लिमिटेडया शेयरधनीतय्सं अप्वः द्यापं फयेमाःगु दु ।
