माओवादी पाखें शेर्पा व किराँत गणराज्य घोषणा

गणराज्य घोषणा लितकाः : झिगू दल

एनेकपा (माओवादीं) सोमवाः थीथी थासय् निगू ज्याझ्वः यानाः थप निगू गणराज्य घोषणा याःगु दु । माओवादीं सोमवाः शेर्पा व किराँत गणराज्य घोषणा याःगु खः । थ्व नापं माओवादीं घोषणा याःगु गणराज्यया ल्याः खुगु थ्यंगु दु ।

सोमवाः सोलुखुम्बुलय् जूगु ज्याझ्वलय् माओवादी अध्यक्ष पुष्पकमल दाहाल 'प्रचण्डं' शेर्पा गणराज्यया घोषणा यानादीगु ख: । शेर्पा गणराज्य घोषणा यानादिसें प्रचण्डं आदिवासी, जनजाति, मिसा, दलितयात अधिकार सम्पन्न दयेकेत संघीय गणराज्य घोषणा यानाःगु धयादिल । वयेकलं झिंनिगू बुँदे समझदारी व अन्तरिम संविधान कथं हे स्वायत्त गणराज्य घोषणा यानाःगु न दाबी यानादिल ।

माओवादी अध्यक्ष प्रचण्डं 'शेर्पा स्वायत्त गणराज्य जिन्दावाद' धासें शेर्पा स्वायत्त गणराज्य घोषणा यानादीगु खः । वयेकलं स्वायत्त गणराज्य घोषणा यानादीगु थ्व न्हापांगु खुशी खः । थ्वयां लिपाः नेवाः स्वयात्त गणराज्य नं वयेकलं हे घोषणा यानादीगु ज्याझ्वः दु ।

अथेहे थ्वस्वयां न्ह्यः हे पार्टीया असहमति बावजुद नं घोषणा याःगु किराँत गणराज्ययात सोमवाः बैधानिकता ब्यूगु दु । कात्तिक २३ गते गणराज्य घोषणा याःगु दिक्तेलय् हे सोमवाः नं छगू ज्याझ्वः यानाः बैधानिक रुपं किराँत गणराज्य घोषणा याःगु खः ।

माओवादी पोलिटब्यूरो दुजः गोपाल किराँतीं सोमवाः किराँत गणराज्यया अस्थायी ज्याकू उल्लेज्या यानाः बैधानिकता ब्यूगु खः । किराँत राज्य घोषणा माओवादीया महासचिव रामबहादुर थापा 'बादलं' यानादीगु ज्याझ्वः दुगु खःसां थ्वः गणराज्य न्हापाः हे घोषणा जुइधुंकूगुलिं थुकीयात बैधानिकता बीत पार्टीं किराँतीयात हे जिम्मा ब्यूगु खः ।

पूर्वया सोलु, ओअलढुङ्घा, उदयपुर, भोजपुर, संखुवासभा लगायत खुगु जिल्लायात किराँत गणराज्य घोषणा याःगु दु । तर थुकीया सिमांकन संविधान सभां क्वःछिगु जानकारी किराँती बियादिल ।

उखे सरकारय् दुथ्याःगु झिगू दलं संविधान निर्माणय् माओवादी बाधक जूगु निष्कर्ष पिकासें संविधानसभाया औचित्यय् न्ह्यसः थने कथं माओवादीं याःगु स्वयात्त गणराज्य घोषणा ज्याझ्वः लितकायेत इनाप याःगु दु ।

प्रधानमन्त्री कोपनहेगन प्रस्थान याये न्ह्यः सोमवाः च्वंगु बैठकं माओवादीया ज्याखँ पाखें शान्ति सम्झौता उल्लंघन याःगु ठहर यासें स्वयात्त गणराज्य घोषणा लगायत आम हड्तालया ज्याझ्वः लितकायेत इनाप याःगु ख: ।