प्रचण्डं शेर्पा व बादलं किराँत राज्य घोषणा याइगु
येँ (सन्ध्या टाइम्स)/ एनेकपा (माओवादीं) संघर्षया हे झ्वलय् यानाच्वंगु गणराज्य घोषणा ज्याझ्वः कथं थौं पार्टीया अध्यक्ष प्रचण्डं शेर्पा स्वायत्त गणराज्य व महासचिव राम बहादुर थापा (बादलं) किराँत स्वायत्त गणराज्य घोषणा याइगु जूगु दु। माओवादीं गणराज्य घोषणा ज्याझ्वः वंगु शुक्रवाःनिसें न्ह्याकूगु खःसां पार्टीया अध्यक्ष प्रचण्डं थौं न्हापांखुसी अथे स्वायत्त गणराज्य घोषणा यायेत्यंगु खः। झिंन्यागू गणराज्य घोषणा यायेगु झ्वलय् प्रचण्डं थौं शेर्पा गणराज्य घोषणा यायेधुंकाः कंस येँया बसन्तपुली नेवाः स्वायत्त गणराज्य घोषणा यानादीगु ज्याझ्वः दु ।
थौं सोलुखुम्बुया सल्लेरीइ जुइगु सभाय् शेर्पा गणराज्य घोषणा याइगु ज्याझ्वः दुसा थौं हे खोताङया दिक्तेलय् छगू ज्याझ्वःया दथुइ माओवादी महासचिव बादलं किराँत गणराज्य घोषणा यानादीगु ज्याझ्वः दु ।
माओवादी पार्टीं न्ह्याकाच्वंगु स्वंगूगु चरणया ज्याझ्वः कथं वंगु शुक्रवाः लिम्बुवान व कोचिला राज्य अले म्हिगः आइतवाः थारुवान व सेती-महाकाली गणराज्य घोषणा यायेधुंकूगु दु। माओवादीया थ्व गणतन्त्र घोषणाया ज्यायात मेगु पार्टीतय्सं धाःसा विरोध यानाच्वंगु दु ।
