प्रधानमन्त्री-रक्षा मन्त्री हानं टक्कर
येँ (सन्ध्या टाइम्स)/शान्ति सेनाया दुजः जुयाः वनेधुंकाः नं चाडं लित छ्वया हःम्ह नेपाली सेनाया मेजर निरञ्जन बस्नेतयात आः सर्वोच्च अदालत यंकेगु लाकि सैनिक अदालत यंकेगु धइगु खँय् प्रधानमन्त्री माधव नेपाल व रक्षा मन्त्री विद्या भण्डारी दथुइ मतभेद ब्वलंगु दु। प्रधानमन्त्री माधव नेपालं बस्नेतयात म्हिगः नेपालय् ज्वनेसातकि सर्वोच्च अदालत यंकि धकाः निर्देशन बियादीगु खःसा रक्षा मन्त्री विद्या भण्डारीं बस्नेत सेनाया मनू जूगुलिं वयात दकलय् न्हापां सेनां निं कारवाही यायेमाः सर्वोच्चय् मछ्वये पना तःगु खः ।
उखे प्रधानमन्त्रीं सर्वोच्च यंकि धकाः निर्देशन बीधुंकाः तक नं रक्षा मन्त्रीं उकिया वेवास्ता यात धासें गृह मन्त्री भीम रावलं असन्तुष्टि प्वंकादीगु दु। प्रधानमन्त्रीया निर्देशनयात थःगु हे सरकारया मेम्ह मन्त्री अवहेलना यायेगु तसकं गैरजिम्मेवारी ज्या खः धकाः गृह मन्त्री रावलं खुल्ला रुपं हे धायेगु यानाच्वंगु खँ सूत्रं कंगु दु ।
खरेलथोकया १५ दँ दुम्ह मैना सुनारयात सैनिक क्याम्प दुने हे यातना बियाः स्याःगु द्वपनय् नेपाःया सैनिक अदालतं सफाई बिउसां उकियात अस्वीकार यासें संयुक्त राष्ट्र संघं कारवाही स्वरुप बस्नेतयात चाडं लित छ्वया हःगु खः ।
