गाडी भीरं कुतुं वनाः झिम्ह यात्रु सित
येँ (सन्ध्या टाइम्स)/कास्कीया कास्कीकोट लागां बाग्लुङपाखे वनाच्वंगु छगः यात्रुबस थौं सुथय् दुर्घटना जुयाः उकी च्वना वःपिं १० म्ह यात्रु सीगु दुसा मेपिं २४ म्ह घाःपाः जूगु दु। घाःपाः जूपिं न्याम्हेसिया अवस्था चिन्ताजनक जुयाच्वंगु खँ धाःगु दु ।
ना .३ ख ६२६८ नम्बरया बस भीरं कुतुंवनाः उगु दुर्घटना जूगु खँ प्रहरीं धाःगु दु। स्थानीय सराङकोट गाविसया शिशु स्याहार केन्द्र लिकसं उगु बस दुर्घटना जूगु खःसा बस धाःसा भीरया दथुइ थानाच्वंगु खँ नं धाःगु दु। अन बस दुर्घटना जुइवं स्थानीय मनूत नापं प्रहरी वनाः उद्धार याःगु खः।
ट्याक्टर दुर्घटनाय् निम्ह सित
गुल्मीया बाडागाँउ धाःथाय् वंगु चान्हय् ट्याक्टर दुर्घटना जुयाः चालक व सहचालक निम्हं मंत। लु. १ त ४६३९ नम्बरया ट्याक्टर दुर्घटनाय् लानाः चालक प्रेम मुखिया व सह चालक हिमाल मगर सीगु खः। घाःपाः जूपिं निम्हेसितं तम्घासया जिल्ला अस्पताल यंकाः वासः याःगु खःसा वासः यायां हे निम्हं सीगु खः ।
छगः कारं प्यंगः ट्याक्सीयात ठकर
उखे म्हिगः बहनी लाजिम्पाटय् लाथेपाथे ब्वाका हःगु छगः कारं अन दिकातःगु प्यगः ट्याक्सीयात ठक्कर नकूबलय् छम्ह मनू सीगु दु। उकी लानाः मेपिं स्वम्ह मनूत नं घाःपाः जूगु खँ प्रहरीं धाःगु दु ।
