नेवाः स्वायत्त राज्य घोषणा सभाय् वनेत आह्वान
थिमि (सन्ध्या टाइम्स)/वइगु पुस ११ गते नेवाः स्वायत्त राज्य मंकाः संघर्ष समितिया आह्वानय् जुइत्यंगु नेवाः स्वायत्त राज्य घोषणा सभाय् वनेत नेवाः स्वायत्त राज्य मंकाः संघर्ष समितिया केन्द्रीय संयोजक नरेन्द्रभक्त हाडां सकलें नेवाःतय्त आह्वान यानादीगु दु। नेवाः स्वायत्त राज्य मंकाः संघर्ष समिति मध्यपुर कचां शनिवाः आदर्श मावि लाय्कुली याःगु नेवाः स्वायत्त राज्य घोषणाया उद्देश्य विषयक सहलह ज्याझ्वलय् वय्कलं उगु आह्वान यानादीगु खः। वय्कलं ११ पुसय् येँय् जुइगु ज्याझ्वलय् ब्यापक रुपं नेवाःतय्गु सहभागिता दयेमाःगु खँ कनादिल ।
उगु सहलह ज्याझ्वलय् विराट गुथिया नायः त्रिरत्न शाक्यं नेवाःत थ्व इलय् हे जागरुक जुइ मफुत धाःसा नेवाःतय्गु अस्तित्वय् हे संकट वयेफुगु खँ कनादिल। स्थानीय माओवादी नेता कृष्णलाल गोजा श्रेष्ठं नं थःपिंसं पुस १ गते यायेत्यनागु नेवाः स्वायत्त गणराज्यया घोषणां नेवाः स्वायत्त राज्य मंकाः संघर्ष समितिया ज्याझ्वःयात ग्वाहालि हे जुइगु खँ कनादिल। उगु ज्याझ्वः नेवाः स्वायत्त राज्य मंकाः संघर्ष समिति थिमिया नायः हरिदास प्रजापतिया सभापतित्वय् जूगु खः ।
