राष्ट्रिय जनगणना २०६८ या तयारी ज्याझ्वः
येँ (सन्ध्या टाइम्स)/केन्द्रीय तथ्यांक विभाग स्वनिगः शाखा तथ्यांक कार्यालय येँपाखें राष्ट्रिय जनगणना २०६८ या सचेतनात्मक व अन्तक्रियात्मक गोष्ठी यात। ओलम्पस क्लबया हलय् केन्द्रीय तथ्यांक विभागया महानिर्देशक उत्तम नारायणया सभापतित्वय् उगु ज्याझ्वः जूगु खः। लिसें केन्द्रीय तथ्यांक विभागया महानिर्देशक व जनगणना महाशाखा प्रमुख विकास विष्ट व उकिया प्रमुख रुद्र सुवालपिं ज्याझ्वलय् थ्यंगु खः ।
ज्याझ्वलय् नेवाः देय् दबूया संरक्षकद्वय लक्ष्मण राजवंशी व मल्ल के. सुन्दर, डा. चुन्दा वज्राचार्य, एमालेया स्वनिगः इन्चार्ज राजेन्द्र श्रेष्ठ, नेपाली कांग्रेस येँया उप सभापति भीमसेनदास प्रधान, माओवादीया श्री कृष्ण श्रेष्ठपिंसं आः जुइत्यंगु जनगणना बारे बिचाः तयादीगु खः ।
सहभागी वक्तातय्सं आः जुइगु जनगणनाय् सुयां नं हस्तक्षेप मजुसे निष्पक्ष रुपं जाति, धर्म, भाषा, लिंग, पेशाय् विभेद मयासे स्वच्छ रुपं तथ्यांक कायेगु ज्या जुइमाः धयादीगु खः।
ज्याझ्वलय् आः वइगु २०६८ असार ८ गतेनिसें राष्ट्रिय जनगणना दिवस न्यायेकेगु व वकुन्हु छन्हु विदा बीगु जानकारी नं बिउगु खः। आः छम्ह गणकं निसः परिवारया गणना कायेगु व उमित माक्व तालिम बिया छ्वयेगु जानकारी नं अन बिउगु खः ।
ज्याझ्वःया निगूगु सत्र केन्द्रीय तथ्यांक विभागया उप महानिर्देशक विकास बिष्टया सभापतित्वय् जूगु खःसा उकी शाखा तथ्यांक कार्यालय प्रमुख धर्मरत्न वज्राचार्य, चुन्दा वज्राचार्य, मल्ल के. सुन्दरपिंसं नं जनगणना सम्बन्धी ज्यापौ हे न्ह्यब्वयादीगु खः ।
नेपालय् प्रत्येक झिदँय् छक्वः जनगणना काइगु चलन दु ।
