नेप्से थहां वनेगु क्रम जारी हे तिनि
येँ (सन्ध्या टाइम्स)/वंगु वाःया न्हापांगु न्हिया कारोबारं निसें छवाःयंकंया कारोबारय् थहां वंगु नेप्से परिसुचक थुगु वाःया न्हापांगु न्हि तक नं निरन्तरता काःगु दु। स्टक एक्सचेन्जया बजाः चालेवं छुं ई तक सामान्य अवस्थाय् दुगु नेप्से परिसुचक करीब नीगु मिनेट लिपा धाःसा निगू अंकं थहां वंगु खः। दथुइ छुं छझाः नेप्से थहां कुहां जुइगु क्रम न्ह्याःगु खःसा लिपा वनाः धाःसा शेयरकारोबारया अन्त तकं नेप्से थहां वंगु खः ।
स्टक एक्सचेन्जया कथं कारोबार जूगु समुह मध्ये नेप्सेय् दकलय् अप्वः प्रभाव लाकीगु वाणिज्य व विकास बैंक समुहया कारोबार थहां वनेवं नेप्से नं म्हिगःया शेयर कारोबारं ७ दशमलव ७४ अंकं थहां वनेवं ५५३ दशमलव ४ अंकय् थ्यंगु दु। अथे हे नेप्से लगायत मेमेगु समुहया नं सुचकत थहां वनेगु झ्वलय् सेन्सेटिभ २ दशमलव ३३ अंकं थहां वंगु दु। फ्लोट शुन्य दशमलव ७५ अंकं थहां वन ।
नेप्सेय् प्रमुख भूमिका दुगु वाणिज्य समुहया नं स्टायण्डर्ड चार्टर्ड व नविल बैंकया शेयरय् सामान्य भाः कुहां वंसा मेमेगु आपालं वाणिज्य समुहया शेयरय् भाः थहां वनेवं कारोबार जूगु उपसुचकय् वाणिज्य समुह दकलय् अप्वः १० दशमलव ३८ अंकं थहां वनाः ५३४ दशमलव ५१ अंकय् थ्यंगु दु। वाणिज्य समुह धुंकाः विकास बैंक समुह ४ दशमलव १४ अंक थहां वनाः ५९५ दशमलव ४१ अंकय् थ्यन। अथे हे जलविद्युत समुह नं २ दशमलव ८१ अंकं थहां वनाः ८१४ दशमलव ९९ अंकय् थ्यन। फाइनान्स समुह नं १ दशमलव ९७ अंकं थहां वनाः ५६२ दशमलव ६२ अंकय् थ्यंगु दु ।
उखे कुहां वःगु उपसुचकय् नेपाल लाइफ इन्स्योरेन्सया शेयरय् प्रति कित्ता ३०/- तका दां कुहां वयेवं थुगु समुहया उपसुचक नं ५ दशमलव ५५ अंकं कुहां वयाः ५७१ दशमलव ६९ अंकय् थ्यंगु दु। अन्य समुहया कारोबार नं २ दशमलव ३५ अंकं कुहां वनाः ५८७ दशमलव ४६ अंकय् थ्यंगु दु।
नेप्से थहां वनाच्वंसां थुकिया लगानीकतातय् दथुइ ब्वनाच्वंगु खिउँजः धाःसा अझं चिलावने फयाच्वंगु मदुनि। लगातार छवाःयंकं नेप्से थहां वनाच्वंसां थ्व ल्याखं शेयर व दांया कारोबार धाःसा सन्तुष्टिगत रुपं थहां वने फयाच्वंगु मदुनि। स्टक एक्सचेन्जया कथं चय्द्वः व च्यासः व नयय्खुगू कित्ता शेयर न्याये-मी जुयाः प्यंगू करोड नीच्यागू लाख नीन्हय्द्वः तका दांया कारोबार जूगु दु ।
न्यय्प्यंगू कम्पनीया शेयर कारोबार जुगुली स्वीप्यंगू कम्पनीया शेयर भाः थहां वंगु दुसा झिंस्वंगू कम्पनीया भाः कुहां वःगु दु। मेगु न्हय्गु कम्पनीया भाः धाःसा यथावत हे जुल। अथे हे कारोबार जूगु कम्पनी मध्ये नं नेपाल एसबीआई बैंकं दांया ल्याखं दकलय् अप्वः न्य्गुंगू लख ग्वीगुद्वः तका दांया कारोबार याःगु दु। अथे हे सहयोगी विकास बैंकं दकलय् अप्वः लबः कायेत ताःलाःगु दुसा प्रति कित्ता ११३/ तका दां द्यापं फयेमाःगु पश्चिमाञ्चल फाइनान्स लिमिटेडं दकलय् अप्वः द्यापं फःगु दु ।
