मंकाः संकल्प प्रस्तावयात अन्तिम रुप बीत मंगलवाः शीर्ष नेतातय् बैठक
वर्तमान राजनीतिक गतिरोध ज्यंकेत मंगलवाः स्वंगू प्रमुख दलया शीर्ष नेतातय् बैठक च्वनीगु जूगु दु । स्वंगू दलया प्रमुख नेता कांग्रेस सभापति गिरिजाप्रसाद कोइराला, एनेकपा (माओवादी)या अध्यक्ष पुष्पकमल दाहाल 'प्रचण्ड' व नेकपा (एमाले)या अध्यक्ष झलनाथ खनाल दुथ्याःगु बैठकं मंकाः संकल्प प्रस्तावयात मंगलवाः अन्तिम रुप बीगु ज्याझ्वः दु ।
प्रधानमन्त्रीया ज्याकुथीइ सोमवाः सुथय् च्वंगु स्वंगू दलया नेतातय् बैठकं मंगलवाः शीर्ष नेतातय् बैठकं प्रस्तवायात अन्तिम रुप बीगु सहमति याःगु खः । बैठकय् प्रधानमन्त्री माधवकुमार नेपाल, माओवादी अध्यक्ष प्रचण्ड व कांग्रेस कार्यवहाक सभापति सुशील कोइराला लगायत नेतातय् उपस्थिति दुगु खः ।
मंगलवाः जुइगु शीर्ष नेतातय् बैठकं मंकाः संकल्प प्रस्ताव तयार यायेत गठन याःगु कार्यदलं न्ह्यब्वःगु प्रस्तावया मस्यौदाय् भाय् सम्बन्धी विवादयात सहलह यानाः ज्यंकी । स्वंगुलिं दलया नेतात मंगलवाःया बैठकं मंकाः संकल्प प्रस्तावया बारे सहमति जुइगु खँ आशावादी दुगु खँ धाःगु दु
