पत्रकार विष्टया आक्रमणय् जिमिगु ल्हाः मदु : वाइसिएल

एनेकपा (माओवादी)या भातृ संगठन वाइसिएलं रुकुमया पत्रकार टीका विष्टयात जूगु सांघातीक आक्रमणय् थःगु संगठनया ल्हाः मदुगु दाबी याःगु दु ।

वाइसिएलं सोमवाः छगू विज्ञप्ति पिथंसें छवाः न्ह्यः पत्रकार विष्टयात अज्ञात पुचलं याःगु आक्रमणय् थःपिनिगु ल्हाः मदुगु दाबी यासें घटनाय् वाइसिएलया ल्हाः दुगु धकाः पुष्टि यायेत सरकारयात हाथ्याः ब्यूगु दु । विज्ञप्ति उगु घटनाय् छानबिन यायेत थःपिसं ग्वाहालि यायेगु खँ न्ह्यथंनातःगु दु । नापं घटनाया दोषीतय्त कडा कारवाही यायेत माग नं या:गु दु ।

अथेहे वाइसिएलं पिकाःगु विज्ञप्तिइ सल्यानय् एमालेया कार्यकर्तातय्सं थःगु पार्टीया कार्यकर्तातय्त उत्तेजित याःगुलिं ल्वापू जूगु धासें उकीया निंतिं हे वाइसिएलया कार्यकर्तातय्त प्रहरीं ज्वनाः यंकूगु दाबी याःगु दु ।