कास्कीइ जूगु बस दुर्घटनाय् झिंछम्ह सित, पीनिम्ह घाःपाः

कास्कीया सराङ्गकोटय् बस दुर्घटना जुयाः झिंछम्ह सीगु दुसा: पीनिम्ह घाःपाः जूगु दु । कास्कीकोट गाविसं पोखरा वयाच्वंगु ना. १. ख. ६२६६ नम्वरया यात्रुवाहक वस सराङ्गकोट गाविस साउनेपानीइ सतकं थ्यंमथ्यं सत्याः मिटर क्वय् कुतुंवंगु खः । कच्ची सतकं भीरय् दयेकातःगु खोल्साय् बस क्रतुंवंगु खः । खोल्साया जःखः च्वंगु सिमाय् खिपः चिनाः बसय् कानाः घाःपाः जूपिन्त उद्दार याःगु दु । दुर्घटनाय् घाःपाः जूपिं पीनिम्हेसित गण्डकी क्षेत्रीय अस्पताल व मणिपाल अस्पतालय् वासः जुयाच्वंगु दु । छुं घाःपाः जूपिनिगु अवस्था तच्वःगु प्रहरीं धाःगु दु । ज्याकुथिं वनेगु ई जूगु हिनं बसय् यात्रुतय्गु भीड जूगु हुनिं दुर्घटना जूगु प्रत्यक्षदर्शीतय्सं धाःगु दु । घटना छु हुनिं जूगु धइगु धाःसा सीमदुनि । घटना लिपा स्थानीय जनता, प्रहरी व प्याराग्लाइडिङ्गया निंतिं वःम्ह छम्ह पर्यटकं उद्दार याःगु खः ।