विष्टया मां पाखें मुद्दा दायर
शान्ति प्रकृया स्यंकेगु कुतः : माओवादी
छवाः न्ह्यः अज्ञात पुचः पाखें आक्रमण जुम्ह पत्रकार टीका विष्टया मां रिखी विष्टं जिल्ला प्रहरी ज्याकू रुकुमय् मनू स्यायेगु उद्योग सम्बन्धी मुद्दा दर्ता या:गु दु ।
पत्रकार विष्टया मां रिखीं दायर याःगु मुद्दाय् सुं नं मनूया नां धाःसा किटानी मयाःगु खँ जिल्ला प्रहरी ज्याकूथीं धाःगु दु । घटना बारे छानबिन तीव्र याःगु खँ नं जिल्ला प्रहरी ज्याकूथीं धाःगु दु ।
प्रहरीं आइतवाः तकया दुने घटनाय् सम्लग्न जूगु आशंकाय् झिंन्हय्म्हसित न्यनेकने याःगु दुसाः च्याम्हेसित ज्वंनाः कुनातःगु दु । प्रहरीं ज्वंपिं मध्ये माओवादीया निम्ह जिल्ला दुजः व वाइसिएलया केन्द्रीय दुजः सहित थप न्याम्ह वाइसीएल कार्यकर्तायात ज्वंगु दु ।
उखे माओवादी प्रवक्ता दीनानाथ शर्मां पत्रकार विष्टयात जूगु आक्रमण शान्ति प्रकृया स्वंकेगु कुतः जूगु टिप्पणी यानादीगु दु । माओवादी रुपन्देहीं आइतवाः भैरहवालय् याःगु पत्रकार सम्मेलनय् प्रवक्ता शर्मां घटनाय् माओवादीयात बदनाम यानाः शान्ति प्रकृया स्यकेगु कुतः याःगु दाबी यानादिल ।
वयेकलं घटनाया दोषी न्ह्याःगु हे पार्टीया जुसां कारवाही यायेमाःगु धासें उगु घटनाया दोषीयात संरक्षण यायेमाः धइगु मान्यता थःगु पार्टीया मदुगु जिकिर यानादिल । वयेकलं पत्रकार विष्टयात जूगु सांघातिक आक्रमण दुःखद जूगु धयादिसें दोषीयात कडा कारवाही यायेमाःगु धयादिल ।
