प्रचण्डया काय चाहिं दंग ?
येँ (सन्ध्या टाइम्स)/रुकुमया पत्रकार टीका बिष्टयात आक्रमण यानाः घाःपाः याना बिउगु विरोधय् सम्पूर्ण पत्रकारिता ख्यः आक्रोशित जुयाच्वंगु इलय् एनेकपा (माओवादी) या अध्यक्ष प्रचण्डया काय भाजु प्रकाश दाहालं धाःसा घटना न्ह्याम्हेस्यां याःगु खःसां थुकी दुःख मनाउ यायेमाःगु आवश्यकता मदु धकाः थः पासापिंत कनेगु यानाच्वंगु खँ सीदुगु दु ।
पत्रकार बिष्टयात आक्रमण याःगु खँयात कयाः थ्व घटना माओवादीं हे याःगु धकाः आशंका यानातःगु दु। थज्याःगु अवस्थाय् प्रकाश दाहालं थथे धया जुल धकाः पिहां वःगु खं पत्रकारतय्त अझ आक्रोशित याये फुगु खँ धाःगु दु ।
सूत्रया कथं भाजु दाहालं खाली माओवादीं जक मनू स्याःगु खंम्ह गज्याःम्ह पत्रकार खः व? माओवादीया उलिमछि मनू स्याःगु मखं ला वं धासें वय्कःयात जूगु घटनाय् दुःख प्वंकेम्वाःगु बिचाः प्वंकादीगु खः ।
उखे बिष्टयात आक्रमण याःपिं धकाः प्रहरीं रुकुमय् छुं मनूतय्त ज्वंगु दु। ज्वंपिं अप्वः यानाः माओवादी समर्थित वाईसीएल कार्यकर्तात खः धाःगु दु। उमिसं हे बिष्टयात आक्रमण याःगु खः धकाः पुष्टि धाःसा मजूनिगु खँ नं धाःगु दु ।
