थौं सेती-महाकाली व थारुवान घोषणा
येँ (सन्ध्या टाइम्स)/सरकार व सरकार पक्षधर राजनीतिक दलया नेतातय् व्यापक विरोधया दथुइ नं एनेकपा (माओवादीं) संघर्षया हे झ्वलय् गणराज्यत घोषणा ज्याझ्वःयात निरन्तरता बीगु कथं थौं छगू जातीय गणराज्य व छगू क्षेत्रीय गणराज्य घोषणा याइगु जूगु दु ।
माओवादीं घोषणा याइगु झिंन्यागू गणराज्यत मध्ये थौं जातीय गणराज्य कथं थारुवान स्वायत्त गणराज्य अले क्षेत्रीय राज्य कथं सेती-महाकाली स्वायत्त गणराज्य घोषणा यायेत्यंगु खः। नेपालगंजय् माओवादीया केन्द्रीय सचिव सीपी गजुरेलं थारुवान स्वायत्त गणराज्य अले दिपायलय् माओवादीया न्वकु नारायणकाजी श्रेष्ठ प्रकाशं सेती-महाकाली स्वायत्त गणराज्य घोषणा यानादीगु ज्याझ्वः दु ।
निगुलिं थासय् ततःधंक सभा यानाः अथे गणराज्य घोषणा यायेगु ज्याझ्वः तयातःगु दु। माओवादीं पुस ३ गते तकया दुने झिंन्यागू हे स्वायत्त गणराज्य घोषणा यायेगु ज्याझ्वः तयातःगु दु। माओवादीं वंगु शुक्रवाःनिसें स्वायत्त गणराज्य घोषणा याःगु खःसा गणराज्य घोषणाया न्हापांगु दिं शुक्रवाः कोचिला व लिम्बुवान स्वायत्त गणराज्य घोषणा याःगु खः ।
