नेवाः स्वायत्त राज्य बारे टोखाय् सभा
येँ (सन्ध्या टाइम्स)/नेवाः स्वायत्त राज्य मंकाः संघर्ष समिति टोखा संयोजन पुचःया ग्वसालय् टोखा गणेशस्थानय् छगू खुल्ला सभा जुल। सभाय् नेवाः न्ह्यलुवा डा. महेशमान श्रेष्ठं नेवाःत छधी छपाँय् जुयाः नेवाःतय्सं याना वयाच्वंगु माग नेवाः स्वायत्त राज्य थ्वहे पुस ११ गते दशरथ रंगशालां घोषणा यायेत्यंगुलिं टोखाया सकल नेवाःतय्त ब्वति कायेत इनाप यानादिल ।
उगु सभाय् नेवाः लोकतान्त्रिक दबूया सल्लाहकार वीरेन्द्र भक्त श्रेष्ठ, नेवाः राष्ट्रिय मुक्ति मोर्चा येँ जिल्लाया नायः उमेश स्थापित, नेपाः लोकतान्त्रिक नेवाः संघया नायः सानुराजा शाक्य व ज्ञानेन्द्र वज्राचार्य, नेवाः जागरण मंचया संयोजक सुजीव वज्राचार्यपिंसं नेवाः स्वायत्त राज्य घोषणा ज्याझ्वः बारे न्ववानादीगु खः। ज्याझ्वः हरिबहादुर मानन्धरया सभापतित्वय् जूगु खःसा नेवाः स्वायत्त राज्य मंकाः संघर्ष समितिया टोखा समन्वय समिति गठन याःगु खः। उगु समितिइ टोखाया थीथी राजनीतिक दललिसे आवद्ध ५१ म्ह कार्यकर्ता दुजः कथं च्वनादीगु दु ।
