छवाःया नेप्से लिसें कारोबार नं च्वय्
येँ (सन्ध्या टाइम्स)/ताः ई लिपा वयाः नेपाल स्टक एक्सचेन्जय् शेयर कारोबारं नेप्से परिसुचक थहां वंगु दु। थ्व वालय् मुक्कं छवाः यंकं नेप्से परिसुचक थहां वंगु दु। वाःया न्हापांगु न्हि ५१९ दशमलव १६ अंकं कारोबार शुरु जुयाः छवाःया दुने २६ दशमलव ५० अंकं थहां वंगु नेप्से ५४५ दशमलव ६६ अंकय् थ्यंकाः बजाः बन्द जुल ।
थ्व छवाःया दुने चय्न्हय्गू कम्पनीया ४०८३ कारोबारं न्यागू लाख ख्वीछद्वः व गुसः कित्ता शेयर न्याये-मी जुयाः स्वीनिगू करोड नीन्यागू लाख न्हय्खुद्वः तका दां बराबरया कारोबार जुल। थ्व स्वयां न्ह्यः वंगु वालय् मुक्क स्वन्हु जक जूगु शेयर कारोबारं चय्निगू कम्पनीया २९६९ कित्ता शेयर न्याये-मी जुयाः झिंप्यंगू करोड न्हय्न्हय्गू लाख न्हय्न्याद्वः तका दां बराबरया कारोबार जूगु खः। दांया ल्याखं थ्व वालय् जूगु कारोबार वंगु वालय् स्वयां ११८ दशमलव २९ प्रतिशतं च्वय् खः ।
अथे हे 'क' वर्गय् लाःगु कम्पनीया जक थ्व वालय् झिंछगू करोड पीन्यागू लाख तका दांया कारोबार जुल। थ्व नेप्सेय् जूगु छवाःया कूल कारोबारया ३५ दशमलव ५१ प्रतिशत खः ।
थ्व ल्याखं थुगु वालय् नेप्सेया लिसें 'क' वर्गया कारोबार मापन याइगु सेन्सेटिभ नं ७ दशमलव ६३ अंकं थहां वंगु दु। वाःया न्हापांगु न्हि १२७ दशमलव शुन्य ९ अंकं शुरु जूगु शेयर कारोबार वाःया लिपांगु न्हि १३४ दशमलव ७२ अंकय् थ्यंकाः कारोबार बन्द जूगु खः ।
थ्व वालय् मुक्कं छवाःया दुने झिंप्यंगू करोड ख्वीगू लाख तका दां व छगू लाख व पीद्वः कित्ता शेयर कारोबार याःगु लिधंसाय् बैंक अफ काठमाण्डु व ६३८ गू कारोबार याःगु लिधंसाय् अरुण भ्याली हाइड्रो पावर कम्पनी दकलय् न्ह्यःने लाःगु दु ।
थुगु वालय् स्टायण्डर्ड चार्टर्ड बैंक व गुहेश्वरी मर्चेण्ट बैंकिङ्ग एण्ड फाइनान्सया बोनस व फेवा फाइनान्स कम्पनीया हकप्रद शेयर नेपाल धितोपत्र बार्डय् सुचीकृत जूगु दु ।
