आदिवासी जनजाति पाखें सिंहदरवारय् धर्ना
संविधानसभाय् आदिवासी जनजातिया बिस्कं हे विषयगत समिति गठन यायेमाःगु, आत्मनिर्णय नापं जातीय स्वायत्तता व स्वशासनया ग्यारेन्टी यायेमाःगु सहितया माग याना: आइतवाः सिंहदरवार पिने धार्ना ब्यूगु दु ।
आदिवासी जनजाति ख्यलय् ज्या यानाच्वंगु थीथी संघसंस्थात दुथ्याःगु बृहत आदिवासी जनजाति मोर्चां ग्वसाःग्वःगु उगु धर्ना ज्याझ्वः शान्तिपूर्ण सांकेति आन्दोलन जक जूगु व थःपिनिगु माग पूमवंकूसाः थप सशक्त संघर्षया ज्याझ्वः घोषणा यायेगु खँ मोर्चां धाःगु दु ।
धर्नायात सम्बोधन यानादिसें मार्चाया सचिव कृष्ण भट्टचनं थःपिनिगु थ्व धर्नायात कमजोर आंकलन मयायेत सरकारयात ख्यच्वः बियादिल । अथेहे धर्ना माओवादी सभासद् सुरेश आलेमगर, आदिवासी जनजनति महिला महासंघया महासचिव सोमा राई लगायतं सम्बोधन यानादीगु खः ।
मोर्चां संविधानसभा व सरकारं न्हूगु संविधान निर्माण प्रकृयाय् आदिवासीतय् मुद्दायात बारे तत्काल सम्बोधन यायेमाःगु नीगुस्वंगु बुँदे माग सहित संघर्षया ज्याझ्वः घोषणा याःगु खः । थ्वस्वयां न्ह्यः मोर्चां प्रधानमन्त्री व सभामुखयात थःपिनिगु माग सहित ज्ञापनपौ लःल्हाःगु खः ।
