गणराज्य घोषणा संविधान विपरित : प्रधानमन्त्री
प्रधानमन्त्री माधवकुमार नेपालं एनेकपा (माओवादीं) यानाच्वंगु गणराज्य घोषणा संविधान विपरीत जूगुलिं तत्काल लितकायेत इनाप यानादीगु दु ।
मिसाः पत्रकारतय् निन्हुन्यंकया राष्ट्रिय भेलाया शनिवाः येँय् उल्लेज्या यानादिसें वयेकलं ईलय् हे संविधान निर्माण यायेगु निंतिं गणराज्य घोषणा लगायत आमहड्तालया ज्याझ्वत लितकायेत माओवादीयात इनाप यानादिल । वयेकलं माओवादीया गणराज्य घोषणाया ज्याझ्वलं देय्यात मुठभेडा पाखे यंकूगु धायदिल ।
प्रधानमन्त्री नेपालं माओवादीं थःगु चरित्र सुधार याःसा सहकार्य यानाः न्ह्याः वनेत सरकार तयार जूगु धयादिल । वयेकलं वंगु खुलाः अथें वंगु व आः संविधान निर्माण यायेत खुलाः जक ल्यंदनीगु धयादिसें ल्यंदनीगु ईलय् माओवादीयात गम्भीर जुइत इनाप यानादिल ।
ज्याझ्वलय् प्रधानमन्त्रीं मिसाः पत्रकारतय्त जुइगु हिंसायात राज्यं सह मयायेगु धयादिसें पत्रकार यदु गौतमया हत्याय् संलग्न जूपिंसं हे पत्रकार टीका विष्टयात आक्रमण याःगु दाबी यानादिल ।
