'थःगु पार्टीया कार्यकर्तायात नियन्त्रणय् तयेमफुसाः अध्यक्ष पद त्वती'
प्रधानमन्त्री माधवकुमार नेपालं थःगु पार्टीया कार्यकर्तायात नियन्त्रणय् तयेमफुसाः एनेकपा (माओवादी) अध्यक्ष पुष्पकमल दाहाल 'प्रचण्ड'यात अध्यक्ष पद त्वतेत हाथ्या बियादीगु दु ।
एमालख काभ्रे जिल्लाया न्ह्य्क्वःगु अधिवेशनया शुक्रवाः उल्लेज्या यानादिसें प्रधानमन्त्री नेपालं माओवादीं द्वन्द्वकालया अराजक गतिविधियात शान्ति प्रकृयाय् वयाः नं जारी हे तःगु द्वपं बियादिल । वयेकलं थःगु पार्टीया कार्यकर्तायात पार्टीया नियन्त्रण दुने तयेमफुगुलिं माओवादी कार्यकर्तातय्सं अराजक गतिविध यानाच्वंगु व उकीं शान्ति प्रकृया व संविधान निर्माणया ज्या यात संकटय् लाकूगु धयादिल ।
माओवादी प्रति आक्रामक रुपं पेश जुयादिम्ह वयेकलं माओवादीया हे कार्यकर्तातय्सं रुकुमया पत्रकार टीका विष्टयात आक्रमण याःगु द्वपं बियादिसें माओवादी कार्यकर्तातय्सं विष्टयात बुखँ च्वःगु हे आधारय् धम्की ब्यूगु व बारम्बार मानसिक यातना ब्यूगु नं धयादिल ।
माओवादी नेतातय्सं थःगु कार्यकर्तातय्सं अराजकता ब्वलंकूगु स्वीकार मयाःगुलिं हे माओवादी कार्यकर्तात स्थानिय तहलय् झन झन अराजक जूगु धयादिल । वयेकलं जग्गा जमिन दयां नं सुकुम्बासीया नांमय् हुकुमबासीयात वन जंगल विनाश यायेत स्वइसाः सरकारं उकीयात कडा कारवाही याइगु स्पष्ट यानादिल ।
प्रधानमन्त्री नेपालं शान्ति सम्झौता व अन्तरिम संविधान कथं माओवादीया लडाकूयात समायोजन, व्वस्थापन यानाः शान्ति प्रकृयायात सफल यायेगु व वइगु जेठ १४ गते दुने संविधान निर्माण यायेगु राजनीतिक दलया आःया प्रमुख एजेण्डा जूगु धयादिसें माओवादीया हे कारणं थ्व याये लिबानाच्वंगु द्वपं बियादिल ।
