माओवादी पाखें कोचिला व लिम्बुवान गणराज्य घोषणा
आन्दोलनरत एनेकपा (माओवादीं) थःगु स्वंगूगु चरणया आन्दोलन स्वरुप शुक्रवाः कोचिला व लिम्बुवान स्वायत्त गणराज्यया घोषणा याःगु दु । स्वायत्त गणराज्य घोषणा यायेगु ज्याझ्वः अर्न्तगत थौं न्हापांगु न्हि माओवादीं थ्व निगू गणराज्य घोषणा याःगु खः ।
कोचिला गणराज्य घोषणा यानादिसें माओवादी पोलिटब्यूरो दुजः नापं राष्ट्रिय जनआन्दोलन समिति नेपालया महासचिव नेत्रविक्रम चन्द 'विप्लवं' संघीय राज्य निर्माण यायेमबीगु षड्यन्त्र जुयाच्वंगु धयादिसें उकीया विरुद्ध व संघीय नेपाःया सुनिश्चितताया निंतिं माओवादीं दवाव स्वरुप गणराज्यया घोषणा याःगु खँ धायादिल ।
विर्तामोडय् कोचिला गणराज्य घोषणा यायेत याःगु ज्याझ्वलय् माओवादीं पूर्वया झापा, मोरङ व सुनसरीयात कोचिला स्वायत्त गणराज्य मैन मत च्याकाः घोषणा याःगु खः । सशस्त्र आन्दोलनया ईलय् झापा, मोरङ व सुनसरीयात कोचिला क्षेत्र नामाकरण यासें माओवादीं थःगु संगठन विस्तार याःगु खः ।
अथेहे माओवादीं थौं हे लिम्बुवान स्वायत्त गणराज्यया घोषणा नं याःगु दु । तेह्रथुमया म्यागलुङय् जूगु ज्याझ्वलय् माओवादी केन्द्रीय नेता सुरेश आले मगरया नेतृत्वय् लिम्बुवान गणराज्य घोषणा याःगु खः । ज्याझ्वलय् लिम्बुवान गणराज्य घोषणा या:सां थुकीया सीमा निर्धारण धाःसाः मयानीगु खँ नेता अले मगरं धयादिल । वयेकलं पार्टी दुने थुकीया बारे व्यापक सहलह लिपाः जक सीमा निर्धारण यायेगु कनादिल ।
थ्वस्वयां न्ह्यःगु निगूगु चरणया आन्दोलनय् हे स्वायत्त गणराज्य घोषणा यायेगु ग्वसाःग्वःगु खःसां तयारी मगाःगु धासें माओवादीं उगु ज्याझ्व: स्थिगित याःगु खः ।
