माओवादी पाखें गृहमन्त्रीयात कारवाही यायेत माग
एनेकपा (माओवादीं) गृहमन्त्री भीम रावलयात कारवाहीया माग याःगु दु । कैलालीया डुडेझारी लिसें सल्यानया लुहापिङ तकया घटनाय् गृहमन्त्रीया फौजी उन्माद व आपराधिक मनोवृत्तिया परकाष्ठा खंगु धासें तत्काल कारवाही यायेत माग याःगु दु ।
माओवादी पाखें गठीत संयुत्त राष्ट्रिय जनआन्दोलन समिति नेपालया संयोजक डा. बाबुराम भट्टराईं शुक्रवाः छगू विज्ञप्ति पिथनादिसें सल्यानय् २०६६ मंसिर २३ गते घेराउ ज्याझ्व क्वचायेकाः बसं लिहांवनाच्वंपिं माओवादी कार्यकर्ताययात सल्यान लुहापिङ कभड हल नापसं एमाले सम्बद्ध युथ फोर्सया जत्थां अप्पां क्येकूगु खँ न्ह्यथंसें उगु घटनाय् आपलं माओवादी कार्यकर्तात घाःपाः जूगु खँ धयादीगु दु ।
राज्यया आडय् सत्ताधारी दलया भातृ संगठनं याःगु उगु आक्रमणया समितिं घोर भर्त्सना यानाःगु खँ विज्ञप्ति न्ह्यथंनातःगु दु । अथेहे कतामरी सरकारया गृहमन्त्रीं उगु घटनाय् वाईसीएलया कार्यकर्ता लगायत युवातय्त गोली क्येकूगु व जनआन्दोलन समितिया जिल्ला संयोजक, माओवादीया सल्यान जिल्ला सेक्रेटरी व वाईसीएल अध्यक्षयात मखुगु मुद्दाय् कुनेत आदेश ब्यूगु द्वपं नं बियादीगु दु ।
अथेहे विज्ञप्ति गृहमन्त्रीया उगु आदेश अस्वीकार याःगु कारणं हे प्रमुख जिल्ला अधिकारी सीतारम कार्की व जिल्लाया निमित्त प्रहरी प्रमुख जुयाच्वनादीम्ह प्रहरी निरीक्षक राजबहादुर खिउजुयात सरुवा याःगु प्रति घोर अपत्ति प्वंकूगु दु ।
