वीरगन्ज अनिश्चितकालीन बन्द
येँ (सन्ध्या टाइम्स)/वीरगन्ज ट्रान्सपोर्ट एशोसियसनं थनिंनिसें अनिश्चितकालीन वीरगञ्ज बन्दया घोषणा याःगु दु। थुकिं यानाः अनया जनजीवन प्रभावित जूगु दुसा भारतीय नाकापाखें नेपाः दुहां वइगु सामान नं बन्द जू वंगु दु।
स्थानीय पशुपति ट्रान्सपोर्टया कर्मचारी राजेश्वर दुवेयात म्हिगः सनिलय् म्हमसिउपिं मनूतय्सं गोलीं कयेकाः स्याना बिउगु विरोधय् पीडित परिवारयात क्षतिपूर्ति नापं दोषीयात कारवाही यायेमाःगु माग यासें थ्व बन्द आह्वान याःगु खः। बन्द आह्वानकर्तातय्सं थौं सुथंसिनें घन्टाघर व माइस्थानय् टायर च्याकाः प्रदर्शन यानाच्वंगु दु। बन्द आह्वानयात अवज्ञा याःगु धकाः उमिसं ना. २ ख ११६ नम्बरया बस व ना. २ ख ९०८ नम्बरया छगः ट्रक तोडफोड याःगु दु ।
बन्दं यानाः शिक्षण संस्था, यातायात, बजाः फुक्कं ठप्प जुयाच्वंगु दुसा बन्दयात थीथी संगठनं नं समर्थन क्यना हःगु दु ।
थ्व हे झ्वलय् तराई लागाय् क्रियाशिल जुयाच्वंगु जनतान्त्रिक तराई मुक्ति मोर्चा (ज्वाला सिंह पुचः) पाखें उगु गोली काण्डया जिम्मा काःगु दु। मोर्चाया पर्सा कमाण्डरं संचारकर्मीतय्त फोन यानाः थ्व जिम्मा काःगु खः ।
