विश्वया दकलय् तजाःगु थाय्या विमानस्थल
येँ (सन्ध्या टाइम्स)/सोलुखुम्बु जिल्लाया स्याङ्बोचेय् च्वंगु विमानस्थलयात विश्वया दकलय् तजाःगु थासय् च्वंगु विमानस्थल धकाः गिनिस बुकय् च्वयातःगु दु। समुद्र सतहं १२,३४० फिट तजाःथाय् दयेकातःगु थ्व विमानस्थल सञ्चालनय् वःगु ला २०२८ सालंनिसें हे खः तर स्थानीय मनूतय्सं हे थुकियात पक्की याके मबिउगुलिं आः तक धू ब्वयेक विमान दिके मालाच्वंगु खँ स्थानीय अधिकारीतय्सं धायेगु याः। थ्व विमानस्थल पक्की जुल धाःसा तग्वःगु जहाज नापं दिके हइगु व थुकिं यानाः स्याङ्बोचे स्वयां क्वय् लाःगु बजाःत सुख्खा जुइगु, स्थानीय भरियातय् ज्या मदइगु व पर्यावरण स्यनीगु खँ न्ह्यःने हयाच्वंगु दु ।
उकुन्हु सगरमाथा कालापत्थरय् मन्त्रिपरिषद्या बैठक च्वं वःगु इलय् स्थानीय मनूतय्सं प्रधानमन्त्रीयात लःल्हाःगु ज्ञापनपत्रय् नं उगु विमानस्थल दयेकेगु छुं माग यानातःगु मदु। थौंकन्हय् अन हेलिकप्टर व पिलाटस पोर्टर जक अवतरण याये जिउ। अन वनेत लुक्लां न्हय्घौ न्यासि वनेमाः ।
