सुकुम्बासी समस्या समाधान यायेत पुस ४ तकया अल्टिमेटम
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' सुकुम्बासी व बाढी पिडिततय् समस्या समाधान यायेत सरकारयात थ्वहे पुस ४ गते तकया अल्टिमेटम बियादीगु दु ।
कैलालीलय् जूगु सुकुम्बासी व मुक्त कमैयातय् ज्याझवलयात शुक्रवाः सम्बोधन यानादिसें माओवादी अध्यक्ष प्रचण्डं थ्व अलटिमेटम बियादीगु खः । वयेकलं सरकारं पुस ४ गते तक नं समस्या समाधान मयासाः पुस ५ गते निसें माओवादीं सशक्त आन्दोलन यायेगु ख्याच्वः बियादिल ।
वयेकलं वन अतिक्रमण यायेगु माओवादीया छुं योजना मदुगु धयादिसॆं थुगु विषयया समाधान केन्द्रीय तह पाखें हे मालेमा:गु बिचाः प्वंकादिल । वयेकलं सरकारं छवाः न्ह्यः कैलालीया डुडेझारी घटनाय् घाःपाः जूपिंत वासः मयाकूसाः माओवादी स्वयमं हे वासः याकेगु व्यवस्था याकेगु धयादिल ।
अथेहे वयेकलं डुडेझारीलय् सरकारं निहथा जनताया गोली क्येकाः शान्ति प्रकृया स्यंकेगु कुतः याःगु द्वपं नं बियादिल ।
