न्यागू राज्य दुने नेवाः स्वायत्त इलाका
येँ (सन्ध्या टाइम्स)/माओवादीं तयार यानाच्वंगु राज्य पुनर्संरचनाया खाकाय् मेमेगु जातितय्सं दयेकीगु न्यागू स्वायत्त राज्य दुने नं नेवाःतय्गु बिस्कं स्वायत्त इलाका दयेकेगु विषययात कयाः खँ जुयाच्वंगु सीदुगु दु ।
जानकार सूत्रं 'सन्ध्या टाइम्स' यात धाः कथं स्वायत्त राज्य दुने नं गुगुं छगू लागाय् मेगु छुं जातिया बाहुल्यता दुसा अन वहे जातियात स्वायत्त इलाका दयेके बीगु प्रावधान माओवादीं दयेकातःगु दु। थ्व प्रावधान कथं तमुवान, ताम्सालिङ, किराँत, लिम्बुवान व कोचिला राज्य दुने नेवाः स्वायत्त इलाका दयेकेगु प्रस्ताव माओवादी दुने वयाच्वंगु खः ।
तर नेवाः स्वायत्त राज्य दुने मेमेगु जातिया स्वायत्त इलाका दयेकेगु बारे धाःसां छुं खँ मवःगु जानकारी नं सूत्रं बिउगु दु।
माओवादीं कन्हय्निसें थीथी स्वायत्त राज्य घोषणा यायेगु तयारीया झ्वलय् नेवाःतय् विषयय् थज्याःगु प्रस्ताव वःगु खः। माओवादीं वइगु पुस १ गते येँया बसन्तपुली नेवाः स्वायत्त राज्य घोषणा यायेत्यंगु दु ।
माओवादीं थःपिनि पुलांगु हे घोषणा कथं कन्हय्निसें झिंस्वंगू राज्य घोषणा यायेत्यंगु दुसा म्हिगः च्वंगु राज्य समितिया इन्चार्ज, जातीय क्षेत्रीय मोर्चाया प्रमुख, राज्य पुनर्संरचना समितिया दुजःपिं नापं पार्टी नेतृत्व दथुइ जूगु मुँज्याय् नारायणी राज्य नं नीस्वनाः झिंप्यंगू राज्य घोषणा यायेगु बारे सहलह जूगु खः ।
