नेवाः व्यापारीलिसे सहलह
येँ (सन्ध्या टाइम्स)/थ्वहे वइगु पुस ११ गते नेवाः स्वायत्त राज्य घोषणा यायेगु ज्याझ्वः ताःलाकेत नेवाः स्वायत्त राज्य मंकाः संघर्ष समितिं नेवाः खुद्रा व्यापारीतनाप सहलह ब्याकूगु दु। थनया चेम्बर भवन जमलय् नेपाल खुद्रा व्यापार संघया नायः पवित्र वज्राचार्यया अध्यक्षताय् जूगु उगु ज्याझ्वलय् संघर्ष समितिया दुजः नापं खलः पुचः समन्वय कमिटीया कजि मल्ल के सुन्दरं ११ गतेया ज्याझ्वः बारे जानकारी बियादीगु खः ।
उगु ज्याझ्वलय् नेवाः खुद्रा व्यापारीतसें नं वकुन्हु संघलिसे सम्बन्धित दक्वं पसः बन्द यानाः ज्याझ्वः ताःलाकेगु निंतिं ब्वति कायेगु लिसें थः गाहाकितय्त नं उकुन्हु सक्रिय रुपं ब्वति कायेगु निंतिं इनाप यायेगु जानकारी बिउगु खः। अथे हे व्यापारीतय्पाखें नं थःगु थासं प्रचार प्रसारया ज्याय् माक्व कुतः यायेगु बचं बिउगु खः ।
उगु ज्याझ्वलय् संघर्ष समितिया आर्थिक कवःया कजि वीरेन्द्र भक्त श्रेष्ठ व प्रचार प्रसार कवःया कजि नरेशवीर शाक्यं ज्याझ्वः ताःलाकेगु निंतिं आः तक जुयाच्वंगु गतिविधियात कयाः जानकारी बियादीगु खः। सहलह लिपा ज्यझ्वलय् व्यापारीतय्सं न्यंगु न्ह्यसःया लिसः समितिया दुजःपिंसं बिउगु खः ।
थीथी पेशाया नेवाः दथुइ अन्तर्क्रिया
पुस ११ गते जुइगु नेवाः स्वायत्त राज्य घोषणा ज्याझ्वः ताःलाकेगु लागिं संघर्ष समितिपाखें नेवाः व्यापारी जक मखु नेवाः दुनेया थीथी जातीय खलः पुचः, थीथी भाषिक संस्था व डाक्टर, इन्जिनीयर, कानून व्यवसायी आदि थीथी पेशा कःघानाः ज्या याइपिं नेवाःतय् दथुइ नं अन्तर्क्रिया न्ह्याकाः संगठन बल्लाकेगु ज्या यानाच्वंगु दु। लिसें थीथी सञ्चार माध्यमतलिसे नं प्रचार प्रसारया खँयात कयाः स्वापू तयेगु ज्या न्ह्यानाच्वंगु दु ।
