राष्ट्रपतिया कार्यभार सुयात ?

येँ (सन्ध्या टाइम्स)/राष्ट्रपति डा. रामवरण यादवं मेगु वालय् यानादीत्यंगु भारत भ्रमणया इलय् कार्यभार सुयात त्वःता थकेगु धइगु खँयात कयाः कानुनी विवाद पिहां वःगु दु। थौंकन्हय् देशय् उपराष्ट्रपतिया पद निष्क्रिय जुयाच्वंगुलिं राष्ट्रपतिया कार्यभार सुयात त्वःतेगु धइगु विवाद पिहां वःगु खः ।

राष्ट्रपति भारत वनीगु इलय् प्रधानन्यायाधीश वा सभामुखयात कार्यभार बिया थकेगु खँ पिहां वःगु खःसां कानूनविद्तय्सं धाःसा राष्ट्रपति थेंज्याःगु सेनाया परमाधिपति समेत जुइगु पद लाक्वपाक्व रुपं हस्तान्तरण याये मजिउ धइगु तर्क न्ह्यःने हःगु दु। बरु थज्याःगु इलय् प्रधानमन्त्रीयात हे कार्यभारत बिया थकेमाः धइगु बिचाः नं कानूनविद्तय्सं न्ह्यःने हःगु दु। अथे हे गुलिखे कानूनविद्तय्सं धाःसा राष्ट्रपति पिहां वनीबलय् सुयातं हे कार्यभार मबिसे वने जिउ धइगु तर्क नं न्ह्यःने हयाच्वंगु दु। विवाद पिहां वःगुलिं आः राष्ट्रपति स्वयमं नं राय कायेगु शुरु यानादीगु खँ सीदुगु दु ।