माओवादीपाखें ज्याभः ज्वनाः जुलुस
येँ (सन्ध्या टाइम्स)/एनेकपा(माओवादी)या थीथी जनवर्गीय संगठनतय्सं थौं देय्न्यंकं थःथःपिनिगु म्हसीका पिब्वइगु ज्याभः ज्वनाः हे विरोध प्रदर्शन याइगु जूगु दु ।
माओवादीया जनवर्गीय संगठन अखिल नेपाल किसान संघ २००७, सुकुम्बासी संगठनंनिसें मुक्त कमैया व हलिया समुदायपाखें थःथःपिनिगु म्हसीका पिब्वइ कथं बुँज्याय् छ्यलीगु ज्याभः, जा नयेगु भु, लः थल, सुकुम्वासीत च्वनीगु छाप्रो तकं प्रदर्शन यासें येँया माइतिघर मण्डलां जुलुस पिकायेगु तयारी यानाच्वंगु खँ अखिल नेपाल किसान संघ २००७ या स्वनिगः कजि धनबहादुर महर्जनं 'सन्ध्या टाइम्स'यात कनादिल ।
थःथःपिनि वर्गीय माग व माओवादीं ल्ह्वनाच्वंगु राजनीतिक माग न्ह्यःने तयाः थौं देय्न्यकंया हे सदर मुकामय् उकथंया प्रदर्शन यायेगु तयारी जुयाच्वंगु दु ।
