थौं पत्रकारतय्गु प्रदर्शन
येँ (सन्ध्या टाइम्स)/ अज्ञात पुचलं पत्रकार टीका बिष्टयात याःगु सांघातिक आक्रमणया विरोध यासें थौं पत्रकारतय्सं सीडीओयात ज्ञापनपत्र बीगु जूगु दु ।
रुकुमय् वंगु मंगलवाः नेपाल पत्रकार महासंघया पार्षद नापं प्रेस चौतारीया दुजः पत्रकार बिष्टयात आक्रमण यानाः चक्कुं तुति व ल्हातय् फायाः सित धकाः वांछ्वयातःगु अवस्थासय् लुइकूगु खः। आः वय्कःयात येँया मोडेल अस्पतालय् वासः याकातःगु दु। उगु घटनाया विरोधय् थौं नेपाल पत्रकार महासंघं येँय् प्रदर्शन यायेत्यंगु खः। महासंघं छुं इ न्ह्यः प्रेस स्वतन्त्रता व श्रमजीवी पत्रकार ऐन लागू याकेगु नितिं मुंकूगु ल्हाःचिं नं थौं सीडीओयात लःल्हायेत्यंगु दु। थौं ३ बजे न्ह्याइगु उगु र्यालीं येँया थीथी थाय् चाःहिलीगु ग्वसाः दु।
मिस्तय् मशाल जुलुस अछामय् मिसाम्ह प्रहरी सुन्तली धामीयात अन हे च्वंपिं मिजं प्रहरीतय्सं याःगु बलात्कारया विरोध यासें थौं पद्म कन्या क्याम्पसया विद्यार्थीतय्सं मशाल जुलुस पिकाल। मिसापिं विद्यार्थीतय्सं रत्नपार्कं सुथय् हे मशाल च्याकाः जुलुस पिकाःगु खः। उमिसं बलात्कारी प्रहरीतय्त कारवाही यायेमाःगु माग याःगु दु ।
