नेप्से थहां वनेगु क्रम म्हिगः नं जारी

येँ (सन्ध्या टाइम्स)/स्टक एक्सचेन्जया शेयर कारोबारं नेप्से परिसुचक थहां वनेगु क्रमं निरन्तरता कयाच्वंगु दु। थुगु वाःया न्हापांगु न्हि निसें थहां वनाच्वंगु नेप्से लगातार प्यन्हु तक मदिक थहां वनाच्वंगु दु। शेयर बजाः चालेवं हे नेप्से म्हिगः छत्थें करीब ६ अंकया ल्याखं थहां वंगु खः। वयां लिपा हाकनं छुं सामान्य अंकं थहां वंगु नेप्से वयां लिपा धाःसा मदिक हे थहां कुहां जुयाच्वन ।

तर नं बजाः बन्द जुइगु इलय् तक थ्यंबलय् धाःसा नेप्से छन्हु न्ह्यः स्वयां भचा अप्वः सुधार जुयाः ७ दशमलव २२ अंकं थहां वनाः ५३७ दशमलव ५७ अंकय् थ्यंगु दु। सेन्सेटिभ नं सुधार जुयाः २ दशमलव ४२ अंकं थहां वन। फ्लोट इन्डेक्स नं शुन्य दशमलव ६८ अंकं थहां वंगु दु ।

वंगु करीब प्यला न्ह्यः निसें दथुइ छन्हु निन्हु त्वःता मदिक कुहां वयाच्वंगु नेप्सेय् ताः ई लिपा थुकथं वःगु सुधारयात लगानीकर्तातय्सं स्वाभाविक रुपं काःसां थुकिं लिपा थ्यंकं गति काइगु खँय् धाःसा विश्वास याये थाय् मदुगु खँ धाःगु दु।
शेयर बजारय् कारोबार जूगु दक्वं समुहया उपसुचक म्हिगःया कारोबारय् थहां वंगु दु। नेप्से थहां वनेगुली मुख्यतः वाणिज्य व जलविद्युत समुहलं मू भूमिका म्हितःगु खनेदत। कारोबार जूगु उपसुचकय् वाणिज्य समुह ११ दशमलव २५ अंकं थहां वनाः ५११ दशमलव १३ अंकय् थ्यंगु दु। अथे हे जलविद्यतु समुह नं ११ दशमलव शुन्य ३ अंकं थहां वनाः ८०८ दशमलव ९७ अंकय् थ्यंगु दु। थ्व निगू समुह धुंकाः छन्हु न्ह्यया कारोबारय् कुहां वंगु अन्य समहु २ दशमलव ३५ अंकं थहां वंगु दुसा विकास बैंक समुहया सुचक शुन्य दशमलव शुन्य ४ अंकं थहां वनाः ५८७ दशमलव ७४ अंकय् थ्यन। फाइनान्स समुह १ दशमलव २५ अंकं थहां वनाः ५५८ दशमलव ६९ अंकय् थ्यंगु दु। वीमा समुह नं शुन्य दशमलव १८ अंकं थहां वनाः ५७६ दशमलव ७७ अंकय् थ्यन ।

नेप्से मदिक कुहां वयेवं लगानीकर्तातय् दथुइ ब्वलनाच्वंगु निराशाया कारणं स्वन्हु तक नं शेयर व दांया कारोबार थहां वये मफया च्वंगु खःसा बुधवाःया कारोबारय् न्यय्च्यागू कम्पनीया छगू लाख ख्वीप्यद्वः च्यासः व ग्वीन्हय्गू कित्ता शेयर न्याये-मी जुयाः च्यागू करोड ग्वीप्यंगू लाख स्वछद्वः तका दां बराबरया कारोबार जुल ।

एल्पीक एभरेष्ट फाइनान्सया प्रमोटर शेयर दकलय् अप्वः ३२,७७५ कित्ता कारोबार जूगु दुसा अरुण भ्याली हाइड्रो पावर डेभलपमेण्ट कं.या शेयर २८३ क्वः तक कारोबार जुल। बैंक अफ काठमाण्डुया प्रमोटर शेयरं म्हिगः नं दांया ल्याखं दकलय् अप्वः निगू करोड नीगुंगू लाख स्वीद्वः तका दांया
कारोबार याःगु दु। किष्ट बैंक लिमिटेडं दकलय् अप्वः कमे याःगु दुसा दकलय् अप्वः द्यापं फःगु क्रिष्टल फाइनान्स लिमिटेड जूगु दु ।